Shillong, Jymmang 12: Ka long ka jingsarong ia ka jylla Meghalaya ha kaba ka kynhun ialehkai Arm Wrestling na Meghalaya ba la tip kum ka Meghalaya Arm Wrestling Association ka la lah ban khur haduh 45 tylli ki Medal na ka lympung ialehkai ba la tip kum ka Asian Arm-Wrestling Championship kaba la long ha Nongbah Delhi.
Kane ka lympung ialehkai Arm Wrestling ha Delhi la pynlong da ka People’s Arm Wrestiling Federation of India (PAFI), ha kaba haduh 14 tylli ki ri ki la wan ban shim bynta bad kynthup ia ka ri India.
Ha kane ka lympung ka India ka la ioh ban khur 176 tylli ki medal ha ki thup bapher bapher bad ka kynhun na Meghalaya ka la ioh ban khur 45 tylli ki Medal.
Kum ka jingsngewsarong halor kane ka jingjop ba ka kynhun ka la ioh khur bun tylli ki medal, akne ka kynhun mynta ka sngi ka la leit ruh ban ia kynduh ia u SSP ka Ri Bhoi u VS Rathore, kum ka jingburom ia ka tnad Pulit na Ri Bhoi, kiba la ju kyrshan na ka por sha ka por ia kane ka kynhun bad ha kane ka kynhun ki don ruh Pulit kiba ialehkai lang ha ka jingialam u Bah Alan S. Marbaniang kum u Team Coach bad uba dei ruh u Organizing Secretary ka Meghalaya Arm Wrestling Association.
Haba ai jingkren sha ki lad pathai khubor, u Bah Alan S. Marbanaing kum u Team Coach bad uba dei ruh u Organizing Secretary ka Meghalaya Arm-Wrestling Association, u la pynpaw ia ka jingkmen ba kane ka kynhun ka la lah ban khur haduh 45 tylli ki Medal ha ki kyrdan bapher bapher jong ka jingialehakai jong katei ka Asian Arm Wrestling Champioinship kaba la long ha Delhi.
U la iathuh ruh ka daw kaba la pynlong ia ka kynhun ban ia kynduh ia u SSP ka Ri Bhoi, ka dei ruh shi bynta ka jingsngewnguh ba ka tnad Pulit na Ri Bhoi na ka por sha ka por ka ju kyrshan ia kane ka kynhun ha ki lympung bapher bapher ba ka Kynhun ka la leit mihkhmat ia ka jylla Meghalaya.
U la ong ruh ha kane ka kynhun ki don ruh ki nongialehkai kiba treikam ha ka tnad Pulit kynthup ia u ruh kum u Pulit ha kaba ka ka tnad Pulit ka ju ailad bad ka ju kyrshan na ka por sha ka por ba dei lyngba ka jingailad na ka tna Pulit ki don ruh ki rang bad ki thei ialehkai na ka tnad Pulit ki la ioh lad ban leit shim bynta ha kum kane ka lympung ialehkai Arm Wrestling.
Shuh shuh, na ka liang u Bah Alan S. Marbaniang u la ai khublei kyrpang ruh naduh ki kmie ki kpa, ka Association bad baroh kiba ju kyrshan ia kane ka kynhun, namar dei lyngba ka jingiatrei lang ka la ai mynsiem ia ki rang bad ki thei ialehkai ban leit shim bynta ha kane ka lympung ialehkai Arm Wrestling kaba dang shu dep long shen ha Nongbah Delhi, u la bynrap.
