Guwahati, Jymmang 12: Ka NorthEast United FC ka la pynpaw ia ka jingkmen kaba khraw bad ruh ia ka khubor kaba sngewtynnad ha kaba la pynbna ba u rangialehkai ba kynsai tam jong kane ka kynhun u Alaaeddine Ajaraie, u ba la ioh khur ruh m ia ka Golden Boot bad ka Golden Ball ha Indian Super League (ISL) 2024-25, un nang bteng ban ialehkai na kane ka Club na bynta ka samoi jong u snem 2025-26.
Ka kyrwoh na ka Northeast United ka la iathuh, ba Ajaraie u la pyn iasoh bad ka NorthEast United FC ha ka sdang jong ka samoi 2024-25 halor ka jingiasoi kular kaba kynthup ia ka jingshah jied ban ialehkai ruh ha ka snem kaba ar, bad namar ka jinglah jong u ban ialehkai bha ha kane ka samoi kaba nyngkong jong u ha ka phutbol India, une u rangialehkai ba shakhmat na Morocco u la pyndep ia kita ki kyndon, kaba la pynlah noh ia ka jingpynjlan ia ka jingiasoi soskular bad u ha kaba na ka liang uAjaraie u la pynpaw ia ka jingthrang ban iai bteng ban ialehkai na kane ka club.
U Ajaraie, u ba la 32 snem ka rta, ha ka samoi kaba nyngkong da ka jingtbit ban ialehkai jong u, u la lah ban ioh thep haduh 29 tylli ki kol bad 10 tylli ki assist ha ki 32 tylli ki jingialehkai ha baroh ki lympung, ha kaba ia ka kol kaba nyngkong jong u na ka bynta ka NorthEast United ha ka jingialehkai kaba nyngkong jong u ka dei ha ka Durand Cup pyrshah ia ka Border Security Force FC – bad u la don ka bynta kaba kongsan ha baroh ka lympung, kynthup ha ka phainal, ha kaba u la thep kol, ai assist, bad thep ia ka penalty jong u ha ka jingiashut penalty ban iarap ia ka NorthEast United FC ban ioh ia ka khusnam kaba nyngkong jong ka.
Ha ka ISL, u Ajaraie u la pyni ia ka jingialehkai kaba pynkyndit ia ki rekod da kaba thep 23 tylli ki kol bad ai 7 tylli ki assist ha ki 25 tylli ki jingialehkai ha kaba u la ioh khur ia ka Golden Boot bad ka Golden Ball, bad ha ka jingpynkut jong u ia ka samoi da kaba thep hat-trick kaba nyngkong na ka bynta ka klob ha ka jingjop kaba heh da 6-0 pyrshah ia ka Mohammedan SC ha ka Kalinga Super Cup.
U Ajaraie u la pynpaw ia ka jingsngewnguh kaba jur ia ki paralok ialehkai jong u, ki nonghikai, bad ki nongpyniaid. “Nga sngewkmen ban don hangne; ka NorthEast ka la long kum ka iing mynta. Ki paralok ialehkai bad ki nongtrei ki la don ka bynta kaba kongsan ha ka jingjop jong nga ha ka samoi kaba nyngkong, bad nga ngeit skhem ba ngi lah ban ioh shuh shuh ha ka samoi ban wan. Nga thrang ban iaibteng ia kane ka jingiaid lynti bad ban jop ia ki khusnam kiba khraw bad kane ka klob kaba bha tam,” la ong u Ajaraie.
“Ngi sngewkmen shisha ba u Alaaeddine un iaibteng bad ngi. Ka jinglah jong u ban ialehkai ha madan da ki jingialehkai kiba bha tam jong u bad shabar madan da ka jinglong kaba bha tam bad ka jingkyrshan ia ki paralok ialehkai jong u, ka la long kaba khraw. U long ruh u nongpyni nuksa uba shisha na ka bynta ki khynnah ialehkai jong ngi, bad ngi khmih lynti da ka jingkyrmen ba un iai bteng ban ialehkai bha bad ban kyrshan ia ka klob ha kane ka samoi kaba ar bad ban long ruh ka jing jop ia ka klob” la ong u Juan Pedro Benali, u head coach jong ka NorthEast United FC.
“U Alaaeddine u la long uwei na ki rangialehkai u ba kynsai tam kiba nga la iohi ha ka phutbol India. U la pynkylla ia ka jingmut jong ka jingbha tam ha ka phutbol India da ki jingialehkai jong u. Ka jinglong sngewrit mynsiem, ka jingaiti jong u ki la pynlong ia u u mawbyrsiew jong ka kynhun jong ngi. Ngi ngeit skhem ba un iaibteng ban buh ia ki matti bad ki dienjat kiba thymmai ha ka phutbol India ha ka samoi ban wan,” ong u Mandar Tamhane, u CEO jong ka NorthEast United FC.
