Nongpoh, Jymmang 13: Hadien bun phew snem tam ba la jah noh kawei na ki Tamasa bad kaba la long ruh kum ka lehniam leh rukam ba paw hapoh ka Raid Nongtham, mynta ka sngi ka Raid Nongtham, ka la ioh ban pynkhie im biang ia katei ka Tamasa kaba la tip kum ka ‘Shad Nohkjat’, ia kaba ki la pynlong hapoh u Lum Nongbah, uba don hajan ka shnong Pamlaban ha Ri Bhoi, ka shnong kaba hap hapoh ka Raid Nongtham, Khyriem Syiemship, Ri Bhoi District.
Haba bteng ban pynlong ia katei ka Tamasa ‘Shad Nohkjat’ jong ka Raid Nongtham, la sakhi da ka jingdon u Dr. Balajied Syiem, Syiem ka Hima Khyriem, nangta u Bah Kynjoh Ryntong, MDC Mawhati, u Paiem T. Syiem, Syiem ka Raid Nongtham, u Bah Shemphang Lyngdoh, u Bah Shanlang Diengdoh, Vice-President ka FKJGP NKHD, ki longsan mansan, ki rangbah shnong na ki shnong kiba hap hapoh katei ka Raid lem bad ki khun ki hajan hapoh katei ka Raid.
Ki nongai jingkren ha katei ka sngi, kaba kynthup naduh u Bah Kynjoh Ryntong, nangta u Dr. Balajied Syiem bad u Bah Shemphang Lyngdoh, ki la ai jingiaroh ia u Paiem T. Syiem, u Syiem ka Raid Nongtham lem bad ia ki longsan mansan, namar ka jinglah ban pynkhie im ia katei ka lehniam ‘ Shad Nohkjat’ kaba dei kawei na ki lehniam tynrai jong ka Raid Nongtham, ia kaba la leh bad ialam da ki longshwa manshwa.
Kitei ki nongkren, ki la kyntu ia u Syiem bad ia ki longsan mansan, kumjuh ruh ia ki nongialam shnong kiba hap hapoh katei ka Raid, ba nangne shakhmat ba ki dei ban iai pynlong ia kaba kum katei ka lehniam, khnang ba kan long kum kawei na ki rukom ban pynheh pynsah iala ka riti bad dustur, kaba la leh da ki longshwa.
La pynshong shit ia katei ka sngi, da ka jingiashimbynta ki khun ki hajar jong katei ka Raid Nongtham, kiba la pyni ia ka rukom lehniam tynrai bad nalorkata la iashimbynta ruh da ki nongshad tynrai jong ka Hima Khyriem Syiemship.
