Nongpoh, Jymmang 12: Na ka daw ka jingiai bteng u Bah Marcus Marten ban kum kum ui nongialam Nongpoh Region Auto Owners and Drivers Association (NRAO&DA) ba la dep ban register thymmai bad ba um dei shuh u nongialam, ki nongialam ba thymmai kane ka kynhun mynta ka sngi ki la leit buh syndon da ka jingtoh ban ujor pyrshah ia u ha ka ophis u District Transport Officer bad ruh hapoh ka Nongpoh Police Station kaba ki pyrshah jur na ka daw ba u dang kam beit haduh mynta ba u dei u nongialam katei ka kynhun ki nongniah Auto Rickshaw ha Nongpoh khlem da ioh bor ruh na ka sorkar ban pynshisha ia ki kot ki sla.
Haba kren sha ki lad pathai khubor, u Bah Banasar Lyngdoh Nonglait President ka NRAO&DA bad u Bah Elianby Tynsong, Education Secretary, ki la ong ba kane ka juk mynta kam dei shuh ka juk ba dang sahdum bad ki briew ki lad stad bad ki la tip lup, hynrei kaba sngewlyngoh ka long ba u Bah Marcus Marten u dang kam jubor beit ba u dei u nongialam wat hadien ba um dei shuh u nongialam bad ruh wat ia ka seng ruh la dep register thymmai bad ki la don la ki jong ki nongialam ba thymmai. Kaba kham sngewlyngoh shuh shuh ka long ba u dang ialam bakla ia ki Dribar Auto Rickshaw ha kaba haduh mynta u dang shim kabu ha ka kyteng ka seng wat ban lum pisa na ki Auto Rickshaw ha Nongpoh.
Namar bun ki nongniah Auto Rickshaw ki la klumar na ka jingkam nongialam jubor une u Bah Marcus Marten, u Bah Banasar Lyngdoh Nonglait u la kynthoh da kaba ong, “Kumno u Bah Marcus Marten u dang nud ban kam jubor ba u dei u nongialam katei ka seng, namar na ka liang ka seng ka la dep ban register thymmai ha ka ophis u Deputy Commissioner ka Ri Bhoi bad ruh ba la ithuh ia kane ka seng da katei ka ophis u deputy commissioner bad kaba sngewlyngoh ka long ba u dang nud ban wan kam trai ban leit pan jingkyrshan na ka ophis u DTO kaba long beain bad kaba kham sngewkhia shuh shuh ka long ba u kam jubor ba u dei u nongialam tang ka Auto Rickshaw kawei ruh um don bad la shu kam jubor khlem nongrim.
U la pynshai ruh da kaba ong ba u Bah Marcus Marten kum u nongialam barim u la dep ban bat kam la 14 snem ei ei ha kaba ki kot ki sla ki la iap lut kumba la lap da ka RTI bad ha u snem 2024 ruh ka kynhun ka la phah da ka jingthoh ba un pynlong noh da ka jingialang ha kaba um sngap satia bad kaba lyngngoh pat ka long ba ynda haba ki nongialam ki la register thymmai ka seng u la leh mynleh khohreh ban da rap jot ia lade ban kam ba u dei u nongialam kane ka kynhun.
Shuh shuh, na ka liang u Bah Banasar Lyngdoh u la iathuh ba u Bah Marcus Marten u la dep ban lum pisa la bun bun snem na ki nongniah Auto Rickshaw bad kaba sngewsih ka long ba lada don kano kano ka jingpang jingshitom ne ki kam aksiden la shu lum beit na ki Nongniah Auto Rickshaw, shaei kata ka pisa ba la lum mynta la bun snem kata la ju lum pisa naduh ka sngi Nyngkong haduh ka sngi Saitjain, buh jingkylli u Bah Banasar Lyngdoh.
La iathuh ruh ba katkum ka jingwad RTI ha ka jingialam jong u, ym don satia wat ka Passbook jong ki bank bad lada ialeh pyrshah ia u pat u la shuh beh lut ia kiba pyrshah bad sa leit kam pat ia ki Association kiba don sha kiwei ki jaka ban shu pynlang briew bad ka jjubab kaba shai kdar ka seng ka la dawa ia u ban un shong thaid noh na ka kam bad lada u dang iai bteng ban kam nongialam kum ka seng ba la ithuh da ka sorkar kam banse ban leit noh sha ki bor ka ain, u la bynrap.
