Shillong, Jymmang 14: U Myntri Rangbah ka Meghalaya, u Conrad K. Sangma, mynta ka sngi u la pynpaw ba ka jingpynmang pisa lyngba ka shuki jong u lane ka (discretionary funds) ba kynthup ia ka Chief Minister’s Special Development Fund (CMSDF) bad ka Chief Minister’s Special Fund (CMSF) ka dei kawei na ki scheme kiba la pynmyntoi shikatdei hapoh ka jylla Meghalaya, namar ka ai lad ia ka sorkar ban pynmang ia ki kam pynroi na bynta ka jingmyntoi jong ki paidbah ha ki shnong ki thaw.
“Kine ka scheme ki long kiba long kiba suk bad kiba khuid bad ka ai lad ia ki jingpynmang ia ki kam pynroi bapher bapher ha kylleng ka jylla,” ong u Conrad K Sangma ha ka jingkren jong u ha ka prokram ba la pynlong ha Don Bosco Sunny Side, Shillong.
U la ong ruh, ba lyngba ka jingpynmang pisa ba la pyllait hapoh kine ki scheme sha ki kynhun bapher bapher, ki seng treimon sngewbha bad kiwei kiwei ka la pynmyntoi shikatdei bad wanrah jingkylla shisha ha ka imlang sahlang.
“Nga sngew sarong ban iathuh ba kane ka scheme, lada phi kylli ia nga, hadien ba nga la nujor bha ia baroh ki scheme jong ka sorkar Meghalaya, ngan ong ba kane ka dei kawei na ki scheme kiba tbit tam bad kaba myntoi shikatdei ia ki paidbah,” u la ong.
Haba ai ia ki P.A. system, ki solar panel bad ki shuki sha ka Dorbar Shnong Sawmer jong ka Upper Shillong, u la ong, “Kane ka dei ka shnong jong nga, nga sngew kum ha la iing, bad kumta ka long kaba kyrpang shuh shuh ia nga mynta ka sngi ban ia donlang hangne bad phi baroh.”
U la ong ruh, ba ia kane ka scheme la lah ban pyllait ha ka por kaba biang bad hateng hateng lada don ki khep kiba donkam kyrkieh, ia kine ki scheme la lah ban mang tang hapoh 2 kynta. “Kane ka scheme ka ai lad ban phah ia ka pisa marmar sha kito kiba donbok ban ioh jingmyntoi,” u la bynrap.
Shuh shuh ruh, u la pynbna ba ia ka pisa kaba la kot kumba 20,79,323 la mang sha ka iing Dorbar, kaba kynthup ia ka jingshna ia ki 120 tylli ki solar light, ban thied ia ki 600 tylli ki shuki plastic, bad ka jingbuh ia ki tiar jingsawa lane P.A. system na ka bynta ki jingpynbna paidbah, da kaba kular ruh ba ka jingmang pisa kan nym kut tang hangne namar ka jingkyrshan kan nang iai tuid sha kane ka shnong.
Khatduh, u Myntri Rangbah u la pynbna ruh ba ia ki jingtei bapher bapher, kynthup ia ki tiar tem, yn ai sha ki seng samla jong katei ka jaka. “Ka put ka tem ka dei kawei na ki mat ba nga thrang eh ban kyntiew, phi tip, ha man la ki kyrdan, namar nga ngeit ba ki samla jong ngi, ki ieit ia ka music, ki kwah ban long shi bynta na kaei kaei kaba don jingiadei bad ka put ka tem, hynrei kim ioh ia ka jingkyrshan kaba ki donkam,” u la pynkut.
