Shillong, Jymmang 14: U Nongialam ka United Democratic Party (UDP) bad uba dei ruh u nongialam ka liang pyrshah ha KHADC u Bah Titosstarwell Chyne mynta ka sngi u la ong ba ka Party UDP ka lah ban shim bynta ha ka jingialang jong baroh ki party Committee ban ia thir halor ka Surok Rel, hynrei u la kren shai ba ka UDP kan pyrshah ban wan rah ia ka surok Rel lada ym don kita ki lad jingiada ba pyrkhing ia ka jingwan rung ki briew kiba na sharbar ka jylla.
Haba kren sha ki Nongthoh Khubor, u Bah Chyne u la ong, “ Ban ka UDP ka lah ban don bynta ha katei ka jingialang ban ia kren halor ka mat jong ka Lynti Rel bad ka party ka dei ka rai kaba khatduh ban shim ia ka rai ban shim bynta” bad bynrap ruh tang u President ne u General Secretary kin nym lah ban shim ia ka rai kaba marwei bad ka rai kaba khatduh hi ka dei ka party” u labynrap.
U la pynpaw ruh da kaba ong, ba ka rai kaba khatduh ban shim bynta ne ym shim bynta ha kane ka jingialang ba la khot da ka sorkar ban ia kren halor ka surok rel kin sa ia kren kham bha ha ka jingialang ka party ka ban sa long ha kane ka taiew ban wan.
Shuh shuh, u la kren shai ruh ba ka UDP haduh kine ki sngi ka UDP ka dang ieng skhem ban pyrshah ia ka jingwan rah ia ka surok Rel bad ka daw ka long ba kim pat don kita ki ain kiba khlain ban ia khun pyrshah na ka jingwan rung kynthep ki briew kiba na shabar ha ka jylla kaba la pynlong ia ka UDP ban dang pyrshah jur ia ka surok rel ban wan rah sha ka jylla Meghalaya, u la bynrap.
