SHILLONG, MAY 14: Ha kaba ia dei bad ka phang ban wanrah ia ka lynti rel ha kane ka jylla, u Bah Kyrmen Shylla, Myntri ka sorkar MDA bad kum u MLA ka party UDP u la pynpaw ba u thrang ba ki paidbah ka Jaintia Hills District kin shim ia ka rai ha kaba ia dei bad ka railway project sha rilum Jaintia la ka dei kaba myntoi ne em.
“Na ka liang jong nga shimet hi, nga thrang ba ki nongshong shnong ka Jaintia Hills kin rai halor ka mat jong ka surok Rel”, ong u Bah Shylla haba ia kren sha ki Nongthoh Khubor.
U la ban jur ruh, ha kaba ia dei bad ka jingdonkam jong ka sorkar jylla ban hiar sha ki paidbah ban ai jingshai lyngba ki jingialang paidbah, kane ka shong ha ka mon jong ki paidbah la ki kwah neem ban wan poi ka surok Rel sha Jaintia.
“Ngi donkam ban pynlong jingialang paidbah (public hearing) bad ai ba ki paidbah kin rai halor kane ka mat, namar ka lynti rel kam dei na bynta jong nga ne mano mano ban rai, ai u paidbah hi un ai ka jubab la ka lynti rel la kan ai jingpynmyntoi ne em ia katei ka thain”, ong u Bah Shylla.
Kum u Myntri ka sorkar jylla u la ong “Ba lada ki paidbah ki ong em ia ka surok rel ha kata hi ka sngi dei ban rai ban pynsangeh ne pynkut noh ia ka mat jong ka surok Rel, hynrei lada u paidbah u thrang ban ioh ia ka lynti Rel ha kane ka thaiñ, balei tang ka sorkar kan kyrshan bad  ai ki paidbah kin shim ia ka rai kaba khatduh “.
