Shillong, Jymmang 14: U Bah Titosstarwell Chyne kum u Nongialam ka UDP bad uba dei ruh u nongialam ka liang pyrshah ha Khasi Hills Autonomous District Council (KHADC) haba kren sha ki Nongthoh Khubor mynta ka sngi u la ong, “Ka jingkynnoh ka HNLC pyrshah ia u Bah Sniawbhalang uba dei u Deputy Chief Minister ka jylla kam da dei eh kaba shongnia ne don nongrim”.
Kum ban pynkynmaw ha kine ki khyndiat sngi, la mih ha ki lad pathai khubor ba ka HNLC kum kawei ka seng ba la shah khein beain, ka la kynnoh ba u Bah Sniawbhalang Dhar u dei uwei na uba la kyrshan pisa ia ka kynhun HNLC ha ki snem ba la leit noh.
Haba jubab pat ia ka jingkylli ki nongthoh khubor, u Bah Titosstarwell Chyne u la kren shai ba kam da donkam eh ban ia kren halor kane ka jingkynnoh ka seng HNLC pyrshha ia u Bah Sniawbhalang Dhar, namar baroh ki jingkynnoh kim da dei kiba khia thew ne don nongrim.
U la ong ruh lada donkam ban ia kren kane ka jingkynnoh ka dei ban don ki sakhi satar ba u don kti ha katei ka kam kumba la kynnoh da ka HNLC bad ban ia kren ne ia thir ba ka long beain khlem da don ki sakhi satar ka long kaba ym don nongrim. Shuh shuh u la ong ruh la jin ba don kita ki sakhi satar la donkam ban ia kren bad ka ain hi kan leh ia kaba donkam, u la bynrap.
