Mumbai, Jymmang 19: Ka Board of Control for Cricket in India (BCCI), da kaba tyngeh ka la weng noh ban shim bynta ha ka Asia Cup 2025 bad ha ka Women’s Emerging Teams Asia Cup, ha kaba ka la kam ba ka don ka jingiakynad kaba jur hapdeng ka India bad ka Pakistan.
Ka women’s Emerging Teams Asia Cup ka dei ban long ha Sri Lanka ha u bnai ban wan, katba ka India pat kan pynlong ïa ka Men’s Asia Cup ha u Naiwieng. Kane ka rai jong ka BCCI ka la buh hadpeng ka jingdum ïa ka Men’s Asia Cup, ka lympung ïalehkai ba kongsan kaba ïashim bynta da ka India, Pakistan, Bangladesh, Afghanistan, bad Sri Lanka.
Ka Asian Cricket Council (ACC) kaba la pynïaid mynta da u Mohsin Naqvi, myntri kam pohïing ka Pakistan bad u heh jong ka Pakistan Cricket Board (PCB), ka ïakynduh ïa ka jingeh kaba khraw namar ba ka jingbymdon jong ka India ka lah ban buh jingma ïa ka jinglong jingman jong kane ka lympung ïalehkai. Ka jingïashim bynta jong ka India ka long kaba kongsan bha na ka bynta ka jingjop ha ka liang ka khaii pateng jong kane ka jingïalang, ha kaba kiba bun ki nongkyrshan bad ka bhah kaba kongsan jong ki nongpeitkai ki wan na India. Ka jingïakhun kaba la khmih lynti bha hapdeng ka India bad ka Pakistan ka long ruh ka jingpynbyrngia kaba kongsan ïa ki nongpynbna khubor.
Kane kam dei ka sien kaba nyngkong ba ka jingïadei kaba sniew bha ka la ktah ha ka jingiadei bad ka jingialehkai Kriket Ha u snem 2023, haba ka Pakistan ka la pynlong ïa ka Asia Cup, ka India ka la kyntait ban leit sha shiliang u pud u sam. Nangta ka BCCI ka la ïakren na ka bynta ki jingïalehkai jong ka India, kynthup ïa ka phainal, ban long ha Sri Lanka ha ka rukom ïalehkai hybrid model.
Na kane ka jingkyntait ka India, ka lawei jong ka Asia Cup 2025 ka lah ban shah ktah jur ha baroh ki liang.
