SHILLONG, Jymmang 19: Ka bor synshar District bad ka tnad Pulit jong ka East Jaintia Hills District mynta ka sngi ki la phah kham bun ki bor Pulit ban pahara ha Star Cement in Lumshnong, East Jaintia Hills district, kaba dei hadien ka jingjia hynnin ka miet sngi U Blei ba ki paid bhur da ka jingbithar ki la leit thang haduh 15 ki Trok kiba don hapoh ka Karkhanaa Star Cement.
Kum ban pynkynmaw, hynnin ka sngi uwei u samla u la duh noh ia la ka jingim, kaba dei hadien ba u la shah iuh ha kawei na ka Trok kit Dewbilat jong ka Star Cement, kaba la pynlong ia ki paidbah ban ia bitar bad ba la mih ruh ka jingiakynad haduh ba ki la leit ban thang syndon ia kitei ki Trok jong ka Star Cement.
“Ban tem ia ka jingiakynad, ki bor Pulit ki la dang phah shuh kham bun ki bor pahara ha katei ka Karkhanaa Star Cement bad na ka liang ki bor synshar District ruh ki la long kiba peitngor ban tem ia kane ka jingjia” Ong u Additional Superintendent of Police ka East Jaintia Hills ha ka kyrwoh ba phah sha ki lad Pathai khubor, bad bynrap ruh “halor kane ka jingjia, la dep ruh ban register case bad la pynlong ruh ia ka jingtohkit kaba bniah” u la bynrap.
La ong ruh ba kane ka jingiakynad ka la sdang shwa na Wahiajer hadien ka jingiatyngkhuh kawei ka Trok Star Cement bad ka Kali Pick-up, ba katei ka Trok Star Cement ka la phet sha Karkhana Star Cement bad u Dribar ka Pick u la beh shaduh katei ka jaka ban shoh ia u dribar katei ka Star Cement ha kaba hadien ba u la dep ban shoh u la thmu ban phet noh bad katei ka Trok Star Cement pat ka la iuh noh ia u, haduh ba u la duh syndon ia la ka jingim hashen.
Katei ka kyrwoh ka la iathuh ruh ba dei lyngba katei ka jingjia, ki paidbah ba la bitar kiba la kot haduh 300 ngut ei ei ki la hiar sha katei ka Karkhana Star Cement ban pynpra ia ka jaka ap nongap paraha katei ka Star Cement bad pynjot ruh ia ka CCTV ryngkat ka jingbom jingshoh ia ki bor pahara bad ruh haduh u pud ba la shah thang kitei ki Trok jong ka Star Cement.
La ong ruh halor kane ka jingjia, ki bor pulit ki la khang pyrshah ia ki paidbah ban thang wat ia ki Kali pynlip ding bad ktah kti ia ki bor pahara bad na kane ka jingkhang pyrshah kitei ki paid bhur ki la ktah ruh wat ia ki bor pulit kiba tem halor kane ka jingjia.
Shuh shuh, la pyntip ruh ba dei lyngba ka jingwan poi bun biang ki bor Pulit la lah ban tem ia kane ka jingjia bad beh noh ia ki paid bhur, ha kaba ka kali pynlip ding ka la lah ban pynlip noh ia ki Trok ba la shah thang ha ki paid bhur.
