Nongpoh, Jylliew 10: Na ka jingialang ba la pynlong da ka Nongtluh Mathan Development Forum bad ka Synjuk ki Rangbah Shnong Raid Nongtluh mynta ka sngi ha madan Umden, ki paidbah ryngkat ki nongialam ki la shim ia ka rai ban leit ai jingkyrshan ia ka Kong Bindas Syiem kaba shah thngan mynta ha Secretariat jong ka nongbah Shillong na ka bynta ban dawa ia ka surok kaba bit ba biang na Nongpoh-Umden-Sonapur.
Kane ka jinglum lang ia kane ka jingialang paidbah ka dei ruh hadien ba ka Kong Bindas Syiem ka la leit ban shah thngan ha Secretariat na ka bynta ka jingangnud ki paidbah ban ioh ia ka surok kaba paka bad kumba long mynta ka sngi kitei ki nongialam ryngkat kiwei kiwei ki nongialam ka HNYF, HITO, CORP ki la wan ban ai jingkyrshan halor ka jingdawa ki paidbah ba dei ban ioh noh ia ka surok kaba paka.
Ha kane ka jingialang la wan shim bynta ruh naduh ki longkmie ki longkpa, ki khun samla bad ki riew rangbah bad lyngba kane ka jingialang ki la shim ruh ka rai ba kin ai ka jingkyrshan kaba pura ia ka jingshah thngan ka Kong Bindas Syiem.
Shuh shuh, ha kane ka sngi nalor ki nongkren ba la kren da ki nongialam bapher bapher ban pynsngew halor ka jingeh ki paidbah na katei ka jingsniew ka surok kaba ki la shah jynjar mynta la bun phew snem bad ha kaba khatduh ka rai kaba ki la shim ka long ba baroh ki paidbah kiba la wan shim bynta ha kane ka jingialang hadien ba la wai ka jingialang kin leit pat sha ka nongbah Shillong na ka bynta ban leit ai mynsiem bad kyrshan ia ka Kong Bindas Syiem.
