Nongpoh, Jylliew 10: Ki bor pyniaid District ka Jiribam hapoh ka jylla Manipur ki la nang iai pyn khlain ia ki bor pahara ha baroh kawei ka District, khamtam ha ki jaka khappud, kane ka jingnang pynkhlain bor pahara ka la long ruh hadien ba la sakhi ba nang jur ka jinyiakynad ha kane ka District Jiribam.
Lah ban kdew, dang shen ka jinyiakynad bad ki huri hura ki la mih ha Jiribam District hadien ka jingshah pyniap klep u wei u rangbah briew ba 59 snem ka rta, u Soibam Saratkumar na ka jaidbynriew Meitei. U ne u rangbah Meitei u la shah pyniap ha ki riew kiengatiar bym lah ban tip ki dei kiei, ki bor pulit ka Jiribam District ki dang pynlong ia ka jingtohkit halor kane ka jingshah pyniap jong utei u rangbah.
Haba sakhi, ba ka jingiakynad ka nang jur na kawei ka sngi sha kawei pat, na ka liang ki bor pyniaid district ka Jiribam ki la nang pynkhlain ia ki bor pahara ban tehlakam ia ka shong suk shongshngain ha ka District hi baroh kawei.
La ioh jingtip, ba ki bor pulit ki la pan ruh ia ka jingiarap na ki Commando ka Ri India, ban iarap halor ka jingtehlakam ia ka shong suk shongshngain ha kaba ki commando ki la wan poi ha kane ka District da ki helicopter ban poi sha Jiribam District kaba don hapdeng ka jingshah pynjari ia ka Curfew.
