Nongpoh, Jylliew 10: Kawei na ka longkmie na ka shnong Diwon ha ka thaiñ Umden mynta ka sngi ka la kren shai kdar ba ka daw kaba ngim lah ban ioh ia ka surok kaba paka wat lada angnud ki paidbah, ka dei na ka daw ka jingdon ki langiong napoh kiba khang lynti ba ka sorkar kan ai ia kata ka mang tyngka ban shna ia kane ka surok na Nongpoh-umden sha Sohnapur.
Kane ka Longkmie ba la tip kyrteng kum ka Kong B. Malai ka la ai jingkren mynta ka sngi ha ka jingialang paidbah ha Umden ba la pynlong da ka Nongtluh Mathan Development Forum bad ka Synjuk ki Rangbah Shnong Nongluh lem bad kiwei kiwei ki kynhun seng, kaba long shi bynta ban ai jingkyrshan ia ka Kong Bindas Syiem kaba shah thngan ha Secretariat na ka bynta kane ka surok na Nongpoh ban iaid lyngba ka Umden sha Sonapur.
Haba kren ha katei ka jingialang paidbah ka la pynpaw beit ba baroh ki paidbah ki la angnud ban ioh noh da ka surok kaba paka bad ka daw kaba kim lah ba ioh ia ka surok ka dei namar ba don kita ki langiong kiba khang lynti ia ka sorkar ba kan phai khmat ban mang tyngka na ka bynta ban shana ia kane ka surok.
Ka la pynpaw ruh da kaba ong ba ka jingshah thngan ka Kong Bindas Syiem ka long kaba ngi dei ban ai ka jingkyrsan kaba pura bad kum ki Longkmie ruh kim ioh jingtip halor kane ka jingthmu, hynrei la jin ba ki la ioh jingtip naduh bas dang wat ki Longkmie ruh ki kloi ban ai ka jingkyrshan kaba pura na ka bynta ka jingiabit ia biang lang ki paidbah ha ka leit ka wan na katei ka surok.
Kane ka longkmie ka la pynpaw pyrthei ruh ba kawei na ka jingduh jingmyntoi na ka jingsniew ka surok ka dei ba ia ka thain Umden la bna nam bha ha ka jingdon u niangryndia bad ka jain ryndia (Eri Silk village) ba la tip ha kylleng ki pyrthei ba ki nongjngohkai na kylleng ki ri ki ju wan poi sha katei ka jaka ban thied ia kitei ki jain ryndia, hynrei na ka daw ka jingsniew ka surok bun ki nongjngohkai pyrthei kim poi shuh bad kane ka long ka jingduhnong kaba khraw ia ki nongthain jain bad kumjuh ruh ia ki paidbah hi baroh kawei.
Namarkata, kum ka Longkmie ka la pynpaw ruh halor shibun ki jingeh ba ki paidbah ki ia kynduh jingeh bad ka jingduh jingmyntoi na ka jingsniew ka surok bad la dei ka por ba ngin don lang ka jingiatylli bad khamtam ban ia kyrshan ia katei ka Longkmie kaba shah thngan ym na ka bynta ka jingmyntoi shimet bad ka dei na ka bynta ka jingmyntoi ki paidbah ban ioh noh ia ka surok kaba biang ban suk ha ka leit ka wan bad ka kit kaba bah ba kum ka sorkar ka la hap ban phai khmat ban mang tyngka kumba la angnud da ki paidbah ban ioh ia kata ka surok kaba paka, ka la bynrap.
NGIM IOH IA KA SUROK KABA PAKA SHA UMDEN DEI BAN DON KI LANGIONG, ONG KA LONGKMIE
