Shillong, Jylliew 25: U President ba rangbah ka Hynniewtrep Achik National Movement (HANM), u Bah Lamphrang Kharbani mynta ka sngi u la kren syndon da ka jingbitar kaba jur bad maham ruh ia ka sorkar Assam ba kam dei ban shu wan kyntur pud jubor sha u pud u sam ka Meghalaya bad kum ka seng kan nym ailad da la lei lei ruh ban shu wan kyntur pud ju bor sha ka khyndew ka shyiap ba hap hapoh ka jylla Meghalaya.
U Bah Lamphrang Kharbani u la pyni ruh ia ka jingbitar bad ka jingbym lah shu tang ban shu peitkai ia ka jingeh ki paidbah ha ki shnong khappud, ka dei hadien ba mynta ka sngi ka seng ka la hiar sha Lapangap ban ai jingkyrshan ia ki paidbah nongshong shnong ka Lapangap kaba la leit ban thang ia ka ïing bad phut lut ia ki tynrai dieng ba la wan thung da ka Assam sha u pud u sam ka shnong Lapangap ba hap ha ka jylla Meghalaya.
“Ngim lah shuh ban shah ia ka jingpynibor ka sorkar Assam ym tang ha ka shnong Lapangap, hynrei ka Assam ka la ju wan klun jubor ia ki jaka ki puta jong ka jylla Meghalaya ha Block II, ha Block II, ha Langpih bad ha kiwei kiei ki jaka khappud bad u la kynnoh ruh ba kane ka jingpyni bor ka sorkar Assam ka dei hi ka jingleh mynthi ka sorkar Meghalaya” ong u Bah Lamphang Kharbani.
U la ong ruh ba ka Meghalaya ka la ioh ia la ka jylla naduh u snem 1972 bad haduh mynta khlem u pud u sam uba pura bad kane ka dei ka jingeh ki paidbah ha khappud ba na ka por sha ka por ki shah thombor ha ka sorkar Assam.
Shuh shuh, u la ong ruh ba ka seng ym tang ba ka la juh mih ban iada ia ki pud ki sam ka jylla, hynrei ka la leit ruh ban shah thngan ha Delhi na ka bynta u pud u sam bad ka la dep dawa ruh na ka sorkar kmie ba ka dei ban pynbeit noh ia u pud u sam hapdeng ka Meghalaya bad ka Assam, namar kum ka seng kam lah shuh ban shah ban iohi ba ki longkmie, ki longkpa, ki samla bad ki nongshong shnong kin shah leh bein ha ki shnong khappud, u la bynrap
