Shillong, Jylliew 25: Naduh ki paidbah nongshong shnong ka Lapangap, ki nongïalam ka FKJGP bad KSU na West Jaintia Hills mynta ka sngi ki la leit syndon ban thang ïa ka jingtei ka Assam bad phut ruh naphang ïa ki tynrai dieng ba la wan thung sha ki jaka ba hap ha pud u sam ka jylla Meghalaya ha West Jaintia Hills.
Kane ka jingpyni bor ki paidbah nongshong shnong Lapangap bad ki nongïalam seng ba kynthup ïa ka KSU bad FKJGP na West Jaintia Hills ka dei hadien ba ki la bitar palat halor ka jingwan thombor bad klun jubor ïa ka jaka ka Meghalaya da kaba wan shna ïa ki jingtei bad wan thung ruh ïa ki tynrai dieng sha ki jaka ba hap sha ka jylla Megalaya.
Kumba la ïathuh da ki nongïalam ka FKJGP bad KSU na West Jaintia Hills ha ka jingïalam u Bah Marhok Kynti Marboh, President ka FKJGP West Jaintia Hills N bad u samla Laitpher Synkrem President KSU West Jaintia hills, ki la ïathuh ba ki pulit ka Assam klem jingmap shuh ïa ki kynthei ki khynnah ha kane ka jingjia ki la siat da ki tiar gas ban pynsad khmat ïa ki paidbah ryngkat ki nongïalam seng kiba la leit ban thang ïa ki jingtei bad ki phut ïa ki tynrai dieng ba la wan thung jubor da ka Assam sha u pud u sam ka Meghalaya.
Kitei ki nongïalam ka seng KSU bad FKJGP ki la maham jur ruh ba kin nym ailad da lei lei ïa ka sorkar Assam ba kan shu wan klun jubor ïa ki jaka ka Meghalaya bad kum ka seng kin don ryngkat bad ki paidbah ka Lapangap wat la da hap ban ïaid da kano kano ka lynti ne kyllon ïap ha madan na ka bynta ban ïada ïa la ka khyndew ka shyiap.
Ha kajuh ka por, kitei ki nongïalam ki la dawa mardor ruh na ka sorkar Meghalaya ban shim khia halor kine ki kam thombor ka Assam bad ruh kane ka jingïakynad kaba la ktah ïa ka shongsuk shongsain ki paidbah bad lada ka sorkar jylla kam shim khia ka hap ban shim ïa ka jingkitkhlieh lada jia kino kino ki jingjia ba sngewsih, namar kum ka seng kan nym lah ban kynran dien ba ka sorkar Assam kan shu klun jubor im im peit peit ïa ka khyndew ka shyiap jong ka jylla, ki la bynrap.
