Nongpoh, Naitung 04: U Bah Charles Marngar, MLA ka Mawhati uba long ruh u nongaibuit jong ka Sorkar Jylla, mynta ka sngi ka sngi u la leit ban jurip ïa ki jaka ai jingsumar ba kynthup ïaka Mawlasnai PHC, ka Tyrso Health & Wellness Centre bad ka Thadrang Health & Wellness Centre. Ka jingthmu jong kane ka jingjurip ka long ban sngewthuh ïa ki jingeh, jingduna bad ki jingdonkam ha kitei ki jaka sumar, khnang ba ki paidbah, khamtam kiba sah ha ki thaiñ khappud bad Assam kiba hap ban wan na ki lynti jngai, kin ioh jingshakri kaba paka.
Ha kane ka jingleit jurip, la sakhi lang da ka A. Pradhan ADC, ka AR Marak (Additional DMHO), u Bah Bokstar Syiem, Block Programme Manager bad kiwei kiwei. Hadien ka jingjurip, u MLA u la pynlong ruh ka jingïalang bad ki nongtrei ka tnad ka koit ka khiah, bad ki nongïalam shnong hapoh ka Synjuk ki Rangbah Shnong Border Area ha Mawlasnai PHC, ban ïamir jingmut halor ki lad ki lynti ban pynbha shuh shuh ïa ka jingshakri jong ki jaka sumar.
Haba kren ha kane ka jingïalang, u Bah Charles Marngar u la pynpaw ïa ka jingsngewkmen kaba khraw ba u la ioh ban leit jurip bad ïakynduh lang bad ki nongtrei jong ka koit ka khiah. U la kdew ruh ba u la pynlum ïa ki jingeh ba u iohsngew ha ki jaka sumar, kum ka jingbym don doctor ha Mawlasnai PHC, ka jingdonkam ban pynheh ïa ki building, ki jaka sah ki nongtrei bad kiwei de khnang ba un lah ban pyntip sha ka sorkar bad kyntiew ha ka rukom ba bha tam katba lah ka bor.
