Nongpoh, Naitung 03: U Bah Sosthenes Sohtun, MLA Jirang Constituency, u la kular hakhmat ki paidbah, ba un pynioh sa ia ka ‘Commerce Stream’ ha Patharkhmah Govt. Higher Secondary School bad katei ka jingkular jong u, ka dei ha por ba u ai jingkren ha ka sngi, ba u la ialam ia u Rakkam A. Sangma, Myntri ka tnat pule puthi ka sorkar jylla, u la leit ban plie paidbah ia ka Arts Stream ha Jirang Government Higher Secondary School.
Katei ka jingkular jong u Bah Sosthenes Sohtun, ka dei hadien ba u la lap bad sngewthuh ba ki samla pule ha ka thain Ri Bhoi Sepngi bad khamta kito ki thmu ban pule ha ka lain ‘Commerce’, ha kaba ki shem jingeh ban bteng ia ki jingpule jong ki, namar ha katei ka thain ym pat don ka ‘Commerce Stream’, hynrei dang don tang ka Science bad Arts Stream.
Kumba ban shu kdew hangne, ba haduh mynta ha Ri Bhoi Sepngi hi, dang don tang artylli ki lain pule, kata na bynta kiba kwah ban pule Science ki hap ban leit pule sha Jirang Government Higher Secondary School bad kaba la ioh ban plie sa ia ka Arts Stream hynnin ka sngi, katba ka Patharkhmah Govt. Higher Secondary School ka don tang ia ka Arts Stream, hynrei lyngba katei ka jingkular jong u MLA, kaba mut ba kiba kwah ban pule ‘Commerce’ ruh ki la lah ban pule hapoh katei ka thain.
Nalor katei ka jingkular jong u MLA, hynrei kaba la pynkmen bad ai mynsiem eh ia ki samla pule hapoh katei ka thain, ka long ba hynnin hi ka sngi, ba u MLA dalade, u la ong ba ka Model Degree College kaba don ha Patharkhmah, yn sa plie noh ha kane ka Academic Session ba mynta u snem, ha kaba lyngba katei ka Model Degree College kan sa iarap eh ia ki samla pule bad khamtam eh na bynta jong kito kiba wan na ki longiing longsem ba duna ka ioh ka kot.
U la pynaw ruh ba kum u MLA u khmih lynti ba ka sorkar lyngba u myntri ka tnad pule puthi bad ruh u Myntri rangbah ka jylla kin shim khia ïa kane ka kam ban wan rah ïa ka Commerce stream ha Patharkhmah Government Higher Secondary School, khnang ba da ka jingdon kane ka Commerce stream kan dang pynsuk shuh shuh ïa ki samla pule katei ka thaiñ.
