Nongpoh, Naitung 06: Tang na ka daw ka jingshoh u khawiang ka kali jong u MLA ka North Shillong u Bah Adelbert Nongrum bad kawei pat ka Kali Maruti 800 ki la shah syllad ha kawei ka Kali Maruti S-presso ha kaba la kynnoh ba la niah da u dribar uba la buaid bad 4 ngut kiba don lang ha katei ka Kali.
Kane ka jingjia ka la jia ha ka por 7 duna ei ei janmiet ha Umiam hajan Orchid, ha kaba la kynnoh ba u dribar katei ka Kali S-Presso kaba don ïa u number ML 05 AB 8537 bad kaba la niah da u Ksankupar Jyrwa ka la leit ban tynrah kynsan ïa ka Kali Maruti 800 kaba don ïa u number ML 05 C 6579 bad ka sa syllad ruh ïa ka Kali Scorpio kaba don ïa u number ML 11 0808 bad kaba dei ruh ka Kali u MLA ka North Shillong u Bah Adelbert Nongrum.
Kumba la ioh lum jingtip ha kane ka jingjia ym shym la don ba la mynsaw bad lait noh ka jingjulor katei ka Kali S-Presso bad ka Kali Maruti 800 bad katba ka kali u MLA pat ka la shu julor malu mala. Ïa kitei ki 2 tylli ki kali ba la kham julor la rah noh sha Umïam Police station.
Ha kane ka jingjia, ki Pulit ka Umïam Police Station ki dang pynlong ruh ïa ka jingtohkit bad la dep ruh ban register case pyrshah ïa katei ka Kali S-presso kaba la leit ban tynrah ïa ka Kali u MLA bad ruh ïa katei ka Kali Maruti 800, kaba dei tang na ka daw ka jingbuaid.
Halor kane ka jingjia, la ioh ruh ban ïa kren bad u Bah Adelbert Nongrum, uba la pynthikna ba kane ka jingjia ka lajia ka dei tang na jingbuaid utei u dribar ka S-Presso uba la wan ban tynrah ïa katei ka Kali Maruti 800 bad ruh ïa ka Kali jong u. U la ong ruh ba ka long ka jingsngewsih ban lap kum kine ki jingjia kiba jia tang na ka daw ki kam buaid bad donbok pat ym shym la don ba mynsaw lait noh tang ki jingjulor jong ki Kali.
U bah Adelbert Nongrum, kum u MLA u la bynrap ruh da kaba ong ba kum kine ki jingjia, dei ban shim khia ka tnad Pulit ban pahara ha ki surok bah bad ym dei ruh ban ailad ïa kino kino ki dribar kiba buaid, namar tang na ka daw ka jingbuaid ka ktah pat ïa ka mynsiem ba lui lui jong kiwei lada don kum kine ki jingjia ba sngewsih.
