Nongpoh, Naitung 05: Haba kren haka jingïalang ban pynskhem ïaki nongkitkam ba thymmai ka Federation of Khasi Jaintia and Garo People (FKJGP) Umling Circle, u Samla Khrawkupar Nongsiej Chief Organizing Secretary ka sengkmie kum u kongsan u la pynpaw ka jingsngewkmen kaba khraw ban iohi ba ki samla ki kloi shakri ïaka jaitbynriew lyngba ka seng FKJGP, hynrei ha kawei ka liang u la pynpaw ka jingsngewkhia kaba jur namar ka jingdon ki nongshun kiba wan ban hiar thma ïaki samla ka jaitbynriew da u drok, bad kum ka seng kan nym shongthaid ban tehlakam bad ban hikai ïaki samla ban long kiba donakor bad kiar na katei ka bih kaba pyntroiñ ïaka met bad ka jaitbynriew.
U la sneng bad kyntu ruh ïaki nongïalam ba thymmai ka Umling Circle ban long shuwa ki nuksa naduh nala rympei namar kam myntoi ba kin pyniasoh bad ka seng FKJGP lada kim don ka jingkitkhlieh ïaka iing ka sem bad jaitbynriew, hynrei ban long ki samla kiba shai bad iohi jngai bad ban kyntu ruh ïakiwei pat ki para samla ban im ka jingim kaba tipbriew tip blei, ban shakri ïaka jaitbynriew lyngba ka kam kaba ki trei namar ka jinglen lade jong ki nongïalam ba mynta kam dei ïaka jingmyntoi shimet jong ki hynrei ïaka pateng ban sa wan.
Ha katei ka jingïalang ban pynskhem ïaki nongïalam ka Umling Circle la sakhi ruh da ka jingdonlang u Samla Varzeleno Lyngdoh Office Secretary ka Sengkmie, ki nongïalam ka FKJGP North Khasi Hills District naduh u Bah Luistar Lyngdoh President, Bah Lumlang Mawnai, Bah Ricky Majaw, Samla Gabriel Sun, Samla Kitborlang Suting bad kiwei kiwei.
Ki nongïalam ba thymmai ka FKJGP Umling Circle ki kynthup ïa u Samla Banroy Wahlang kum u President, Carnilos Lyngdoh Senior Vice President, Shemphang Wahlang Vice President, Precious Syiem General Secretary bad kiwei kiwei bad ïa kitei ki nongkitkam ba thymmai naka bynta ka samoi treikam jong u snem 2025-28 la pynskhem da u Samla Khrawkupar Nongsiej Chief Organizing Secretary ka FKJGP sengkmie.
