Nongpoh, Naitung 07: Ka 2nd Thrills Swimming Competition ne ka jingïakop jngi um jong u snem 2025 kaba la sdang ha ka 5 tarik u Naitung 2025 bad la pynhap pyrda noh ha ka 6 tarik u Naitung 2025 ha Thrills Fun Park Mawlein Mawkhan bad ha kane ka jingpynkut noh ïa kaneka jingïakop jngi la iohi ïa ki sap kyrpang jong kito ki nongshim bynta ha kane ka jingïakop jngi.
Ha kane ka jingïakop jngi la wan shim bynta haduh 76 ngut na kylleng ka jylla Meghalaya bad la phiah ruh ha ki kyrdan bapher baher ba kynthup naduh ki rta ba hap hapoh ka 10 snem,14 snem,17 snem, 18 snem shaneng bad 35 snem shaneng.
Kane ka jingïakop jngi ka dei kaba la ïa trei ryngkat da ka Thrills Society bad ka Motor Sports Club ka Meghalaya (MSCM), ba la ai lad ban shim bynta kum ka Freestyle, Backstroke, Butterfly, Breaststroke, bad Medley Relay formats.
Haba pynkut ïa kane ka jingïakop jngi la don ryngkat naduh u Bah William Hek, Promoter, Thrills Society, u Bah Jayden Nongkhlaw – National Motocross Rider, u Bah Arted Kharsati u dkhot ka Motor Sport club ka Meghalaya, u Bah P.K Kurbah, Rangbah Shnong Mawlein Mawkhan, u Bah Eugene Niangti – President, MSCM lem bad kiwei kiwei de.
Kum ka jingpynshlur, ha kane ka sngi la sam ïa ki trophy, medal, syrnod bad ki jingai sngewbha sha kito ki nongjop ha ki kyrdan bapher bapher bad kane ka jingai khusnam ka long ruh shi bynta kum ka jingpynshlur halor ka jingwan shim bynta jong ki.
Kumba la pynpaw da ka Motor Sports Club ka Meghalaya, ka jingpynlong ïa kane ka jingïakop jngi kam dei satia tang ba ioh ka jingithuh ïa kito kiba don ka sap kyrpang ha ka jingjngi um bad ka long ruh ban kyntiew ïa ki samla ba kin don ïa kata ka sap bad khamtam ka koit ka khiah ha kaba ki shm bynta ha kum kine ki jingïakop jngi.
