Shillong, Naitung 10: Ka Kynhun Myntri Sorkar hynne ka sngi kala mynjur ia ka Meghalaya Film Tourism Policy 2025.
Kane ka long kum shi bynta ban kyntiew ia ki kam shna phlim hapoh Jylla ban pynlong ia ka Meghalaya kum ka jaka pdeng ban shna ia ki phlim hapoh ka thain Shatei Lam Mihngi (North East).
Haba pynbna ia kane u Myntri ka tnat Tourism u Bah Paul Lyngdoh u la ong ba ka Meghalaya Film Tourism Policy 2025 kan ai ka jingkyrshan da kaba ai subsidy ba kot haduh T.1 klur lane 25% na ka jingpynlut ia ka phlim sha kito ki phlim kiba pyndonkam da ki ktien ba kren bun paid eh hapoh ka Ri bad kumjuh ruh jong ki ri ka pyrthei, kaba ka jingring ia ki phlim ka dei ban long 75% haka jylla Meghalaya.
U Bah Paul u la pyntip baka Sorkar kan sa thaw ia ka “Film Facilitation Cell” ka ban wanrah ia ka jingiatreilang hapdeng ki tnad ka Sorkar, kynthup a tnad jngohkai, Arts & Culture bad DIPR.
U la iathuh ba ha ki bnai bala dep ka Sorkar kala wanrah iaka Draft Meghalaya Film Tourism Policy 2025 ha kaba ka Sorkar kala pan ia ki jingai jingmut na baroh ki kynhun kiba don bynta ha kane ka kam.
“Mynta ka sngi ngi la wanrah ia ka policy hapoh ka jingialang ka kynhun myntri kala don ka jingiakren kaba sani bha bad hadien ka kynhun myntri kala ai jingmynjur ia ka Policy. Kane ka dei ka sienjam kaba khraw ban pynthikna ba ngin plie ia ka Meghalaya ha ka rukom kaba heh bha lyngba ka film tourism ne ka jingwan shna phlim ha Jylla” la ong u Bah Paul.
U Bah Paul u la iathuh ba kane ka polisi kan pynshlur ia ka jingpynmih phlim ha ka kyrdan National bad International bad ruh ban pynlong ia ka Meghalaya kum ka jaka ban shna phlim ha ka thain Shatei Lam Mihngi.
“Nga sngewkmen ban pyntip sha phi ba ki nongpynmih phlim ha ka ktien Khasi, Pnar bad Garo kin ioh ia ka jingkyrshan subsidy ba T.50 lak ia kaba ki nongshna phlim ki lah ban ioh ia kane ka jingiarap shisien ha man ka 2 snem” u la ong.
