Nongpoh, Natung 11: Ki paidbah nongshong shnong Shnong ka Maikhuli mynta ka sngi naduh ki Rangbah, ki longkmie, ki samla bad ki nongïalam shnong, ki la ïa mih paidbah ban pyrshah halor ka Memorandum of Understanding (MOU) ba la soi hapdeng ka sorkar Meghalaya bad ka sorkar Assam ha ka jingïapynbeit pud pynbeit sam ba kawei na ka Pung Dohkha kaba ai jingmyntoi shibun eh ïa ki paidbah nongshong shnong ka shnong Maikhuli la pynhap sha ka jylla Assam.
Kitei ki nongshong shnong ki la ïa mih ban rah la ki banner, ki placard bad ki jingthoh bapher bapher ban dawa na ka sorkar Meghalaya ba ka dei ban pynioh biang ïa katei ka Pung Dohkha, namar katei ka Pung Dohkha ka dei kaba la long trai da ka Shnong Maikhuli ba la ju pynmih pisa da kaba ri dohkha ban kyrshan ïa ka skul bad ruh ki jingdonkam jong ka shnong.
Kumba la ïathuh, katei ka Pung Dohkha ka dei kaba la ri la sumar da ka Shnong Maikhuli mynta la 50 snem tam bad ka hap hapoh u pud u sam ka Meghalaya ha Ri Bhoi District bad ki shnong ki la ju ïa khun ruh ban long kum u pud u sam hapdeng ka Meghalaya bad ka Assam bad ha kane ka kynti pat la ïa soi ïa ka MOU la pynahp jubor sha ka jylla Assam ha ka jingpynbeit pud kaba dei ha ka wat kaba nyngkong.
Lyngba kane ka rally ïaid paidbah, la dawa biang na ka sorkar jylla Meghalaya bad Assam ban pynkylla noh ïa ka MoU ba la ïa soi bad ban pynphai noh ïa kane ka pung ri dohkha sha ka shnong Maikhuli, bad ki la pynpaw ruh ba da lei lei kin nym ailad ban duh noh ïa katei ka pung ba kan leit sha ka jylla Assam.
Haba kren sha ki lad pathai khubor, u Nicholas Marak, Rangbah Shnong ka Maikhuli bad u Heniton Marak, Rangbah Shnong barim ka Shnong Maikhuli, ki la ong ba ki paidbah nongshong shnong hi baroh kawei ki da pyrshah jur ïa kane ka Pung Dohkha ba la pynhap sha ka Assam ha ka jingïasoi ïa ka MoU ban ïa pynbeit pud pynbeit sam bad ki la pynpaw ruh ha ka jingshisha katei ka Pung Dohkha ka dei kaba la ri la sumar da ka Shnong mynta la 50 snem ei ei ba kane ka pung dohkha ka la ai jingkyrshan ban kyrshan ïa ka skul bad kiwei kiwei ki jingdonkam jong ka shnong.
Ki la ïathuh ruh halor kane ka pung Dohkha, ka shnong na ka por sha ka por ka la ju leit ai ïa ka dorkhas sha u Myntri rangbah ka jylla u Conrad K. Sangma bad sha ka sorkar ban pynkulla noh ïa ka MoU bad ruh ban pynphai biang ïa katei ka Pung Dohkha sha ka Shnong, hynrei haduh mynta kim shym la ioh kano kano ka jubab na ka sorkar.
Namarkata, ki la ong ruh ba baroh ki nongshong shnong ki la rai ban ïa pyrshah beit lada katei ka Pung dohkha kan leit noh sha ka Assam bad da lei lei ruh kin nym ailad ban leit sha ka Assam ha kaba kim banse ban leit da kano kano ka lynti ruh ban ioh biang ïa katei ka pung dohkha kaba la ri la sumar da ka Shnong Maikhuli bad kaba long hi ruh ka nongkynti ka shnong Maikhuli, ki la bynrap.
