Nongpoh, Naitung 27: Bun tylli ki Kali ar shaka ba kynthup naduh ki Scooty bad ki motorbike kiba pynkheiñ aiñ mynta ka sngi U Blei ki hap ban siew ïa ka kuna, kaba dei hadien ba ki la shah bat ha ki Pulit Traffic ka Nongpoh, kiba la pynlong ïa ka jingtalasi naphang ïa ki Kali ar shaka.
Ki Pulit ka tnad Traffic na Nongpoh Police Station mynta ka janmiet ki la pynlong ïa ka jingtalasi ïa ki Kali ar shaka ha ka surokbah National Highway hajan ka ophis u Deputy Commissioner ka Ri Bhoi bad ha kane ka jingtalasi ïa ki kali ar shaka bun tylli ki la shah bat bad ki hap ban siew ïa ka kuna katkum ka Motor Vehicle Act halor ka jingpynkheiñ kyndon jongki.
Ha kane ka jingtalasi la ïalam da u Sub Inspector u Bah L. Ingty bad la don lang kiwei ki Pulit kiba la bat naphang ïa ki Kali ar shaka ba pynkhein aiñ. Kane ka jingbat naphang ïa ki Kali ar shaka ka dei na ka bynta kito kiba pynher sted bad kiba ym deng ïa ki Helmet.
Kumba la ioh lum jingtip na ki Pulit, tang mynta ka sngi U Blei ki la ioh lum ïa ka khajna kaba la kot haduh T. 34,000 lyngba ka E-challan bad kito kiba pynkheiñ aiñ ki hap ban ban siew ïa katei ka kuna bad lada kim siew ki hap ban ngat katkum ki kyndon jong ka aiñ.
