Shillong, Naitung 27: Ka Sorkar Meghalaya kala thoh shaka Sorkar Assam ban pan ka jingiatreilang ha kaban pyntreikam iaki kyndon ban pynduna ia ka jingjaboh ka lyer hapoh ka thain Byrnihat Ri-bhoi District.
Kane ka jingdonkam ban iatreilang hapdeng ka Assam bad ka Meghalaya kadei namar bun ki karkhana kiba dei ki daw bah bad jaboh ka lyer hapoh ka thain Byrnihat ki don haki khappud hapdeng ki artylli ki Jylla.
Ia kane la pyntip da u Chairman ka Meghalaya State Pollution Control Board (MSPCB) u R Nainamalai.
U Nainamalai u la ong ba mynta ka jinglong jingman jong ka lyer hapoh ka thain Byrnihat Ri-Bhoi District ka long kaba pdeng (Moderate) katkum ka Air Quality Index hadien ka jingshim khia ka Sorkar ban khang iaki katto katne ki kharkhana ba pynkhein kyndon.
U la iathuh ba naka por shaka por ka MSPCB kala phah notice bad haka juh ka por leit jurip iaki karkhana lada ioh jingujor ba kim bud kyndon.
“Ngi la dep thoh shaka Sorkar Assam ban iatreilang bad ka Sorkar Meghalaya bad nga tharai ka (Sorkar Assam) ka dang don hapoh ka jingpynkhreh ban thaw ia ka Joint Action cum Coordination Committee ban pyntreikam iaki kyndon ban pynduna iaka jaboh lyer haki thain Byrnihat Ri-bhoi District” la ong u Nainamalai.
