Nongpoh, Naitung 28: Ban peitngor ba ioh ka don ka jingshah ktah ka Ri Bhoi District bad ha ka jylla hi baroh kawei, hadien ka jingkynra naphang ka sorkar Assam ia ki Nong Bangladesh kiba wan ban sah beaiñ ha ka jylla Assam, ka MDC ka Nongpoh Constituency ka Kong Rona Khymdeit mynta ka sngi ka la leit ban ia kynduh ia u Deputy Commissioner ka Ri Bhoi bad ruh ka la aiti da ka dorkhas ban kyrpad ia ka bor synshar District ba kan long kiba peitngor ban nym don kino kino ki ban wan rung beaiñ sha kane ka District bad sha ka jylla.
Ha ka jingleit kynduh ia u Deputy Commissioner ka Ri Bhoi, u Abhilash Baranwal la ialam da ka Kong Rona Khymdeit kum ka MDC bad la synran lang da ka jigndon lang u Working President ka NPP Nongpoh Block u Bah Rayonald Kharkamni, u President ka NPYF Nongpoh Block u Bah Drum Lymphuit, ka President ka NPP Women Wing Nongpoh Block ka Kong Philisha Kharhunai lem bad kiwei.
Haba kren sha ki lad pathai khubor, ka Kong Rona Khymdeit kum ka MDC ka Nongpoh, ka la ong ba ka daw kaba la pynlong ia ka kum ka MDC ban leit kynduh ia u Deputy Commissioner ka Ri Bhoi, ka dei hadien ba ka sorkar Assam ka la khynra naphang ia ki Nong Bangladesh kiba wan ban sah beaiñ ha ka jylla Assam bad namar ba ka Ri Bhoi District ka don ha syndah ka Assam kane ka la ban buh jingma ba ioh kitei ki Nong Bangladesh kiba shah beh na Assam kin wan ban phet rieh sha Ri Bhoi District bad wat ha kane ka jylla Meghalaya kaba don markhap bad ka jylla Assam.
Shuh shuh, ka la pynpaw ruh ia ka mynsiem jong ka jingsngewkmen ba u Deputy Commissioner ka Ri Bhoi, u la kular ban shim khia bad ban pynlong noh ia ka jingialang kaba kyrkieh jong ka bor District, khnang ban ioh ban tehlakam ne ban peitngor ba ki phetwir Bangladesh na Assam kim dei ban ioh ban wan rung ne riehtngen ha kane ka District bad ka jylla hi baroh kawei, ba ka jylla Meghalaya ka dei ka jylla kaba don mar syndah bad ka jylla Assam, ka la bynrap.
