Nongpoh, Naitung 28: Ki nongialam jong ka seng KSU bad RBYF Warmawsaw Unit, hynnin ka sngi u Blei, ki la ioh ban bat ia shiphew ngut ki bar jylla bym don kot don sla bad kiba la wan wan trei bylla sha ki shnong kiba don ha ka thain Warmawsaw, Ri Bhoi Sepngi.
Ka kyrwoh kaba la phah da ki nongialam ka KSU bad RBYF Warmawsaw Unit, la ong ba kitei ki shiphew ngut ki bar jylla, ki dei kiba la wan da kawei ka kali kaba don ia u number AS-25EC-3985, ha kaba ki la pyndonkam lyngba ka surok na Bakhlapara ban poi sha Warmawsaw.
Haba la poi ha Warmawsaw, ki dkhot ka KSU bad RBYF, ki la bat ia ki bad haba ki la kylli ia ki kot ki sla, kitei ki bar jylla kim shym la lah ban pyni, kaba la pynlong ia ki nongialam bad ki dkhot jong kitei ki ar-seng ba kin beh noh shi syndon ia kitei ki bar jylla.
Hadien ba la ioh bat bad pynphai dientrai noh ia kitei ki shiphew ngut ki bar jylla, na ka liang u Bah Receive Pator President ka KSU Warmawsaw Unit bad u Bah Armour Mawblei, President ka RBYF Warmawsaw Unit, ki la ong ba nangne shakhmat kin long kiba peitngor bha halor ka jingwanrung ki bar jylla, kiba ym don ia ki kot ki sla kiba biang bad khamtam eh ba katei ka thain ka dei kaba iajan eh bad ka jylla Assam.
