Shillong, Jylliew 12:
Ka Civil Hospital Shillong (CHS) ha ryngkat bad ka State Cancer Society (SCS), Meghalaya mynta ka sngi ka la pynlong ia ka jingrakhe ia ka sngi kaba kyrpang jong ki briew kiba la koit na ka jingpang cancer ia kaba la tip kum kata ka National Cancer Survivors Day. Ia kane ka jingrakhe kaba la pynlong ha DAE-Civil Hospital Cancer Wing jongka Civil Hospital, Shillong.
Ka myntri ba dei khmih ia ka tnad jong ka koit ka khiah ka jylla, ka Dr Mazel Ampareen Lyngdoh ka la wan ban iashim bynta ha kane ka sngi kum ka kongsan, ha ka jingiadon ryngkat u Sampath Kumar, Principal Secretary jong ka tnad Health & Family Welfare bad uba dei ruh u Chairman jongka State Cancer Society ka Meghalaya, u Dr. Joram Beda, Commissioner & Secretary, Health & Family Welfare, u Dr. F.V. Kharshiing, Director, Health Services (MI), ka Dr. Lily S. Ch. Marak, Additional Director, Health Services, ka Dr. Anisha Mawlong, Head of Department, Oncology Department, Civil Hospital lem bad kiwei kiwei de.
Kum ban shu kdew, ka jylla Meghalaya ha u bnai Rymphang mynta u snem 2024 ka la pynlong ruh ia ka Meghalaya Cancer Conclave ryngkat ka phang pdeng ‘Close The Care Gap’ ha kaab la ioh ia ka jingiashim bynta jong ki doctor, ki riew shemphang, ki nongwad bniah ia ka jingpang cancer, ki NGO, ki heh ophisar ka sorkar nalor kiwei kiwei de da kaba phai khmat kyrpang kumno ban weng ia ki jingduna ha ka rukom ai jingsumar ia ka jingpang cancer bad ban pynthikna ban ai ia ki lad jingsumar kiba long lang kumjuh ia baroh.
Haba kren ha kane ka sngi, na ka liang ka Dr Mazel Ampareen Lyngdoh ka ong ba ka sorkar jylla ka don ia ka jingkitkhlieh bad shimkhia ba ki paidbah kidei ban ioh ia ki lad jingsumar cancer kaba paka bad ba ka dang ialeh ruh kumno ban wanrah ia ki kor ki bor sumar kiba iahap kyrdan katkum kane ka juk kaba mynta ha manla ki district jong ka jylla.
‘Ngi dang don hapdeng ka lynti iaid kaba jngai shakhmat, ngin nym sangeh, ngin nym ong ba ngi la dep ban leh lut ia baroh. Lem bad ka sorkar, ngin iai shakri ia ki paidbah. Ym ia ki riewshimet, ne ki myntri ne ki doctor ne ki nongtrei, hynrei ryngkat lang ngin iakhun ia kane’ la ong ka Dr Mazel Ampareen Lyngdoh.
Ha kane ka sngi la ioh ruh ia ka jingphla jong ki katto katne ki briew kiba la koit na ka jingpang cancer ha kaba kwei na ki, kala pynpaw ia ka jingsngewnguh sha ki doctor bad nongsumar jongka Civil Hospital, Shillong kiba la ai iaka ia ka jingsumar kaba paka tam bad kyntu ruh ia kiwei pat kiba ioh ia ka jingpang cancer ba kim dei satia ban sheptieng, hynrei ba kidei ban leit phah peit doctor bad ioh ia ka jingsumar ha ka por kaba biang.
