Shillong, Jylliew 12:
Ka Public Works Department (PWD) jong ka sorkar jylla ka la rai ban shimkhia noh mardor na ka bynta ban pynbha ia ka surok Nongpoh-Umden-Sonapur lyngba ka North East Special Infrastructure Development Scheme (NESIDS) bad ka Pradhan Mantri Gram Sadak Yojana (PMGSY)-III.
Ia kane la pyntip da u Secretary jong ka tnad PWD, u Bah KK Mawa uba la iathuh ba ia ka surok na Nongpoh sha Umden ha ka jingjngai kaba 20 kilometer la pynrung lyngba ka skhim NESIDS (Roads) kaba yn bei tyngka da ka tnad Development of North Eastern Region (DoNER) ha ka jinglut kaba la kot sha ka T. 52 klur.
U Bah KK Mawa u la pyntip ruh ba ka jingshna ia katei ka surok Nongpoh-Umden kan long katkum kata ka intermediate lane bad ka jingtrei kan kynthup naduh ka jingtih khyndew ban pynheh, ka subgrade, protection works, ka jingshna ia ki nala, ki kynroh bad kiwei kiwei de.
Kumban shu kdew hangne, ka tnad DoNER ha u bnai Lber 2024 ka la buh hakhmat eh ia ka surok Nongpoh-Umden kaba jngai kumba 20 kilometer ha ka mang tyngka ka jongka, hynrei kane ka kam, la sahteng noh namar ka jingdon jong ka election Lok Sabha ban jied ia ki MP sha ka Ing Dorbar Thawain ka ri.
U Bah KK Mawa u la iathuh ruh ba ka Detailed Project Report (DPR) jong kane ka surok Nongpoh-Umden ka dang don hapdeng ka jingpynkhreh bad ha ka taiew ba kut jong une u bnai Jylliew, yn phah pat sha ka Planning Department, kaban sa phah pat ia kane sha ka DoNER lyngba ka North Eastern Council (NEC).
Shuh shuh, ha kaba iadei bad ka surok na Umden sha Byrnihat, kaba don ia ka jingjngai kaba 39 kilometer, ka sorkar kan pyntrei bad pynbha ia kane ka surok lyngba ka skhim PMGSY-III ha ka jinglut kaba la kot sha ka T. 50.95 klur.
Na ka liang ka sorkar jylla lyngba ka tnad PWD, ka don ia ka jingkyrmen ba ia baroh ar tylli kine ki surok, kata ka Nongpoh-Umden-Sonapur bad ruh ia ka surok Umden- Byrnihat yn lah ban sdang treikam noh mynta u snem 2024 tang mar ia ioh ia ka jingmynjur bad ka jingmang tyngka na ka sorkar kmie.
