Shillong, Naitung 28: Ka long shisha ka jingai mynsiem ia kiba bun ki thei don sap ka jylla ha ka jingialehkai Cricket hapoh ka jylla, ha kaba ka Meghalaya Cricket Association (MCA) kum ka kynhun ba peit kyrpang ia ka kam ialekai Cricket ka la pynkhreh shaid ban jied ia ki thei ialehkai ha ka senior Category, na ka bynta ban mih khmat ia ka jylla ha ka samoi ialehkai hapoh ka ri ban pynlong da ka Board of Cricket Control in India (BCCI) kaba long na ka bynta jong u snem 2025-26.
Kumba la iathuh da u Bah Rayonald Kharkamni, uba dei u Honorary Secretary ka Meghalaya Cricket Association, u la pynpaw ba ka lympung ialehkai na ka bynta ka samoi 2025-2026 ki senior women ka dei na ka bynta ka senior women T20 Trophy ba la rai ban pynlong ha ka 8 tarik u Risaw haduh ka 15 tarik u Risaw 2025 bad na ka bynta ka Senioir Women ODI Tophy kan long ha ka 6 tarik u Rymphang haduh ka 14 tarik u Rymphang 2026.
Na ka liang ka MCA kumba la ai jingmut ha ka Senior Women Selection Committee, ka la lah ban jied haduh 25 ngut ki thei ialehkai ha ka senior category, kaba la jied ruh ia ki katkum ka sap kaba ki la ialehkai kaba dei katkum ka MCA Selection Trial ba la pynlong mynta u snem ha Jagiroad, Assam bad ruh katkum ka BCCI domestic season 2023-24 bad 2024-25.
La iathuh ruh ba kine ki 25 ngut ki samla kynthei ba la shah jied ki kynthup 13 ngut na Ri-lum Khasi Jaintia, 5 ngut na Ri-lum Garo bad kiwei ki dei na Shillong bad na Ri-Bhoi District. Ka kyrteng jong kine kiba la shah jied ki kynthup ia ka Luiza Tamang, Saiaka E Warjri, Saryti Kumari Ray, Ankita Sharma, Indariakor Kharwanniang, Debashmita Dutta, Neha Hajong, Ruby Chettri, Solina Jaba, Mansi Anand], Ajima A Sangma, Deiphibapynshngain L Mawnai, Sandria K Momin, Monica L Phawa, Riticia Nongbet, Monycable Marbaniang, Sildamicresha Marbaniang, Rebeldalis Syiemlieh, Blaridahun Dkhar, Sistilin Ryntathiang, Dianchidora Sangma, Janika Marak, Pilika Marak, Reitrki Poshna bad ka Dublin Nengnong.
U Bah Rayonald Kharkamni u la pyntip ruh ba ka MCA kan pynlong ia ka final selection cum preparatory camp la kumno kumno ha ka taiew ba nyngkong u bnai Nailur 2025 na ka bynta ban jied ia ki thei ialehkai ha katei ka lympung ka BCCI bad ha kawei ka bynta ka MCA ka la buh ruh ka jingkyrpad sha baro ki 25 ngut ba kin dang bteng ka jingkilan met tad haduh ba ka MCA kan pynlait ia ka tarik na ka bynta ka selection cum preparatory Camp, u la bynrap.
