Shillong, Naitung 28: Ka Hynniewtrep National Youth Front (HNYF) hynne ka sngi kala leit ujor sha u Myntri ka tnat Excise u Bah Kyrmen Shylla halor ka jingai No Objection Certificate (NoC) ka Dorbar Shnong Pommura ban plie dukan Kyiad (Wine Store).
Haba kren shaki lad pathai khubor u Working President HNYF Mawryngkneng Circle u Bah Robert Sohtun ula iathuh ba kane ka jingpyrshang ka seng ban ai NoC kadei namar ka thain kala don lypa dukan kyiad (Wine Store).
U Bah Robert ula ong ba ka thain Pommura kaba don marjan bad ka shnong Mawryngkneng kala don lypa dukan kyiad bad kumjuh ruh ki don bun tylli ki dukan kiba dei kyiad beain.
“Ngi pynpaw ia ka jingpyrshah halor ka jingai jingbit jong ka Dorbar Shnong Pommura ban buh dukan kyiad (Wine Store) biang sa kumba 4 ne 5 tylli eiei. Kumta na ka liang jong ngi ngi phai khmat sha phi ba phin shim ia ka sienjam ban pynsahngeh noh mardor ban ai Licence ban buh dukan” la ong u Bah Robert.
U Bah Robert ula kynnoh ba ka jingdon ki dukan kyiad bad ka jingdie kyiad beain ka wanrah ki jingjia ba sngewsih bad ki bym sngewtynnad kum ka jingduh ia ki mynsiem briew bad ki jingjia aksident kali, ka jing iashoh iadat bad ka wanrah ruh ka jingktah ia ki shnong ba Marjan.Haba kylli u Bah Robert ula iathuh ba naka liang u Myntri ula kular ban bishar bniah bha ia kane ka kam.
