Nongpoh, Naitung 28: Kawei na ka seng bhalang na them Ri Bhoi ba la tip kum ka Ri Bhoi Peoples’ Council (RBPC) ka la mih shakhmat ban pyrshah jur ia ka jingthmu ka skulbah University of Science and Technology, Meghalaya ban kdup ia kito ki longïing Muslim kiba shah beh na Assam ha katei ka skulbah da kaba shim kabu ha ka kyrteng kata ka ka ‘Mission Educational Rehabilitation’ ryngkat ka sponsoring body jongka, ka Education Research & Development Foundation (ERDF).
Kane ka jingthmu ka USTM ban kdup ia kito ki longïing bad khamtam ki khynnah ban ai jaka riehtngen ha katei ka skulbah, kad ei hadien ba ka sorkar Assam ka la khynra naphang ia kito kiba shong beaiñ ha Assam bad bun na ki jaid byrniew Muslim ki la kylla khlem ïing khlem sem hadien ba la shah kyndang ha ka sorkar Assam.
Ban pyrshah halor kane ka jingthmu ka skulbah USTM ban kdup ia kitei ki phetwir na Assam ah aktei ka skulbah bad khamtam ban ai jingnang jingstad ia ki khynnah kiba la shah beh na ka longïing ki Muslim na Assam, ka seng Ri Bhoi Peoples’s Council (RBPC) ka la pynher syndon da ka jingthoh sha u Deputy Commissioner ka Ri Bhoi, u Abhilash Baranwal ban kyrpad ia ka bor synshar district ba kim dei ban ailad ia ka USTM ban leh ia katei ka kam da kaba shim kabu ban iarap para briew ha ka kyrteng katei ka ‘Mission Educational Rehabilitation’.
Haba kren sha ki lad pathai khubor, u President ka RBPC u Bah Jayson Lennox Nongrum, u la ong ba ka seng ka pyrshah jur halor kane ka jingthmu ka skulbah USTM bad kane ka jingthmu ban kdup ne ai jaka riehtngen ia kito kiba la shah beh na Assam ka long beaiñ bad ka USTM ka don u pud u sam ka Meghalaya bad ka long beaiñ hi ruh ban leh ia katei ka kam khlem da ioh jingbit na ka sorkar jylla.
U la pynpaw ruh ba lada ka USTM ka kdup ia ki khynnah kiba la duh ia ka pule ka puthi hadien ba las hah kyndang na Assam, kaei ka ban jia ia ki khynnah na Ri Bhoi bad na Meghalaya, ha kaba bun na ki kim kot bor ban pule sha ki kyrdan kiba shaneng ba ban ka jingduk jingkyrduh bad mynta pat katei ka skulbah ka thmu ban kdup wat ia ki briew kiba na shabar ka jylla ha kaba katei ka skulbah pat ka don ha u pud u sam ka jylla Meghalaya.
Shuh shuh, na ka liang u Bah Jayson Lennox Nongrum kum u President ka RBPC u la bynrap da kaba ong ba ka seng kan nym pdiang satia ia katei ka jingthmu ka skulbah USTM ban kdup ia ki samla kiba la shah kyndang na Assam ban ai jingnang jingstad ha katei ka skulbah bad kum ka seng ka pyrshah jur ba ka USTM ka don ha u pud u sam ka jylal Meghalaya ba ia ki kam leh isynei dei ban leh shwa ia ki briew jong ka Meghalaya bad ym iata kita kiba shah kyndang na kiwei ki jylla, u la bynrap.
