Nongpoh, Nailar 02: Kum shi bynta ban ai mynsiem bad ban ai jingiarap ia ka longing jong uwei u rangbah uba la shah rong noh ha ka wah Iewsier, ha kaba ym pat lap dien satia ia u haduh mynta, ka Khasi Students Union, Nongpoh Circle hynne ka sngi, ha ka jingialam jong u samla Baïashanlang Kharshanlor kum u General Secretary lem bad ki dkhot, ki la rah ïa ki mar bam ba donkam ban leit ai sha ka longïing jong u rangbah uba la shah rong ha ka um.
Kum ban shu pynkynmaw, Une u rangbah ba la jah ha ka jingshah rong ha ka umbah u dei u Bah E.B Nongshli na ka shnong Umtasor Mawdakhar, ha kaba u la shah rah ha ka um hadien ba hap na jrong Jingkieng sha ka wah naduh ka Lah Sngi U Blei.
Ka jingleit sam jong ka KSU da ki mar bam sha kane ka longing kaba mad ia kane ka jingjia, ka long ruh kum shi bynta ban pyntngen bad ban ai mynsiem ia ki bahaiing jong une u rangbah, ha ryngkat ki paidbah nongshong shnong bad kumjuh ruh ia baroh kiba dang bteng bad iai trei shitom haduh mynta ban wad ïa ka met une u rangbah ba la jah mynta la shi taiew ha katei ka wah.
Na ka liang u samla Baïashanlang Kharshalor, General Secretary ka KSU Nongpoh Circle, ula pynpaw iaka jing sngewlem bad u la kitbok kitrwiang ïa kiba haïing bad ïa ka shnong ba kin lap noh ïa ka met jong utei u rangbah khnang ba kan weng noh ïa kane ka jingeh ba ka ïing ka sem bad ka bor shnong hi baroh kawei ki la ïa kynduh.
Nalor kata, u la ai jingïaroh ruh ia ki nongïalam shnong bad ki paidbah nongshong shnong kiba la bteng ïa ka jingwad ïa utei u rangbah, ha kaba la bun sngi mynta ki la bteng ka jingïawad kaba long shi bynta ban pyntngen bad ban ai mynsiem ïa ka longïing jong utei u rangbah.
