Nongpoh, August 02: Haba leit ban pyniasoh ia lade sha ka Party BJP ha Ri Bhoi District ha ka jingialang kaba la long mynta ka sngi ha Dorbar Hall ka Shnong Harlibagan Byrnihat, u Samla ALbertus, uwei na u nongialam ka NPP ha Ri Bhoi bad u dkhot nongialam ha Jirang Constituency, u la ong ba ka daw kaba la pynlong ia u ban pyniasoh sha ka BJP paty, ka dei namar ba dei ka party BJP kaba wan rah ia ki kam pynroi sha kane ka jylla bad ym ka NPP Party.
U la ong ba kum u samla u kwah ban wan kata ka jingkylla kaba treikam ha baroh ka jylla bad ruh ba ki paidbah ki dei ban ioh jingmyntoi bad ym kumba la kam da ka NPP party ba ka wan rah ia kata ka jingkylla ha ka jylla bad ki dei pat ki kam pynroi ba la wan rah da ka BJP kum ka party kaba bat ia u lakam synshar ha ka ri India hi baroh kawei.
“Ka Party NPP ka wan rah jingkylla tang na ka bynta ki katto katne ngut ki nongialam ba hakhmat jongka ha kaba tang hapoh 2 ne 3 snem ki la riewspah bad ki la kylla long kita ki High Level bad ym ba ka wan rah ia kata ka jingkylla na ka bynta ka jylla” ong u Bah Albertus Lapang, bad bynrap ruh kum u uwei u samla u la shim ia kane ka rai ban rung noh sha ka BJP ka dei namar ba dei tang ka BJP kaba lah ban wan rah shibun ki kam pynroi bad ia kane la sakhi ruh ha kiwei ki jylla ba synshar ka BJP ki wan shibun ki kam pynroi bad haba kren ha ka jylla Meghalaya lada ym dei ba ai kam pynroi ka BJP kin nym don satia kita ki kam pynroi.
La sakhi lang ruh ha kane ka sngi ban pdiang burom ia u Bah Albertus Lapang sha ka party BJP lem bad kiwei ki nongialam na ka NPP, UDP bad Congress da ki nongialam ka BJP ba kynthup ia u President ka Yova Mocha u Bah Mewaker Lyngdoh,m u President ka BJP Ri Bhoi, u Bah Sen Thabah lem bad kiwe ki nongialam ka BJP na Jirang bad na Ri Bhoi District.
Ha kane ka sngi, na ka liang ka BJP Jirang Mondal ka la pynkup burom ruh ia u Samla Johny Nongrum , kum rangiakura MMA ba paw ka jylla, kaba long kum ka jingburom ia ka nam bad ka burom kaba u la wan rah ha ka jylla lyngba ka sap kyrpang kaba u don ha katei ka kam ialehkai MMA bad kiwei ki jingialehkai Sport.
