Jammu & Kashmir, Jylliew 13: Ha ka jingjia shah hiar thma kynsan pyrshah ia ki nongleit nongwan da ki kynhun kiengatiar ba shyrkhei ha kawei ka thain jong ka Jammu & Kashmir hapoh ka ri India, u wei u nongniah bus ba la tip kyrteng kum u Vijay Kumar u la khlad noh hadien ba u la shah siat na ki bynta ka khlieh tang na ka daw ba u la pyrshang ban pynlait im ia ki 40 ngut ki nongleit nongwan kiba shong ha ka bus kaba u niah. Kane ka jingjia kaba sngew triem ka la jia ha ka sngi U Blei jong kane ka taiew.
Ki Khubor ba la pynmih ha kylleng ka ri India, ki la pynpaw ia ka jingsngewsih bad ruh ka jingiaroh kaba khraw halor ka jingshlur jong u ne u nongniah Bus, u ba la aiti ia la ka jingim ban pynlait im ia ki nongleit nongwan kiba shong hapoh ka bus kaba u la niah, hadien ba ki riew kiengatiar ki la pynsangeh ia ka kali ha ka thain Jammu & Kashmir bad namar ka jingbym kohnguh jong u ne u nongniah bus ki riew kiengatiar ki la siat ia katei ka bus bad u ne u nongniah u la khlad noh hadien ka jingdei ki kuli na ki bynta ka khlieh.
Haba kren bad pyntip sha ki Nongthoh Khubor, u Ranjit Singh, u ba dei trai jong kawei ka Bus Booking Agency, u la iathuh ba kum kine ki jingjia shah lute ne ka jingleh kam pyntriem jong ki riew kieng atiar hapoh kine ki thain jong ka Jammu & Kashmir, ki dei kiba la ju jia khah khah, watla ki pulit ne ki Army ki ju pyrkhing bha ia ka jingpahara, hynrei la iathuh, ba ki riew kiengatiar ki ju pyrshang bha ban lute ia ki nongleit nongwan ha kaba bunsien kine ki riew kiengatiar ki ju siat pyniap ruh ia ki nongleit nongwan tang namar ba kim ju siew ia ka pisa kaba ki dawa ne ha kiwei kiwei pat ki bynta.
U Ranjit Singh, u la iathuh ruh, ba u la ioh ia ka jingtip halor ka jingjia pyrshah ia ka bus kaba dei napoh ka Agency jong u, ba ki riew kiengatiar ki la pyrshang ban pynsangeh ia ka bus jong u, kaba la kit ia ki 40 ngut ki nongleit nongwan, hynrei u nongniah jong kane ka bus u Vijay Kumar u ba la don lypa ka jingtip ia ki jingjia kiba ju jia man ka por, da ka jingshlur u la iakhun pyrshah ia ki riew kiengatiar kiba la pyrshang pynsangeh ia ka bus kaba u la niah ban iada ia ki nongleit nongwan kiba la shong ha ka bus jong u bad ha kane ka por, ki riew kiengatiar ki la siat da ka suloi pyrshah ia ka bus bad ha kane ka jingsiat ki runar, ki kuli ki la dei na ki bynta ka khlieh jong u ne u nongniah bus u ba la khlad noh tang hadien katto katne por hynrei u la lah ban pynlait im pat ia ki nongleit nongwan kiba shong ha ka bus jong u.
Ban iaroh bad ban ainam ia ka jingshlur jong u Vijay Kumar ban iada ia ka jingim jong ki nongleit nongwan sha ka thain Jammu & Kashmir, na ka liang ki bor pyniaid district bad ki bor ka ain ki la pyndon burom ia u Vijay Kumar ha ka sngi pyndep ia ka met jong u da kaba tap da ka lama Lai Rong jong ka Ri India kum ka jingpyrto ia ka jingshlur jong u ban pynlait im pat ia ki 40 ngut ki mynsiem briew.
Na ka liang ki bor pulit ka Jammu & Kashmir ki iaid shakhmat ban pynlong ia ka jingtohkit halor katei ka jingshah hiar thma ki nongleit nongwan kiba la shong ha katei ka bus bad ki la ai jingiaroh ruh ia ka jinglen lade ia la ka jingim da u nongniah jong kane ka bus.
