Nongpoh, Nailar 04: Ka Seng Samla Byrnihat Parish ha ka jingialam u Samla Duke James Syiem lem bad ki samla ki la lah ban pynkut noh ia ka Summer Penalty Shootout ha ka sngi Saitjain ha ka madan ialehkai kaba don ha Byrnihat Parish, ha kaba haduh 144 tylli ki kynhun ki la wan ban shim bynta ha kane ka Summer Penalty Shootout.
Kum ban pynpaw, ka seng Samla Parish Byrnihat ka la pynlong ia kane ka Penalty Shootout ka long shi bynta ban pynmih pisa na ka bynta ban pdiang ia ka Convention ki samla bad ruh ban pynbit pynbiang ia kiwei kiwei ki kam kiba dei na ka bynta ka jingiaid shaphrang ka Seng Samla Parish Byrnihat.
La wan ban pynhap pyrda ia kane ka Summer Penalty Shootout da u Working President ka RBYF u Bah Liander Nongshli kum u kongsan bad la don ryngkat ruh u Bah Neversad Makdoh Sport Secretary ka RBYF kum u symbut kongsan bad ryngkat ka jingdon lang ki nongialam ka Seng Samla Byrnihat Parish.
Kum ka jingkyrshan ia kane ka Seng Samla Parish Byrnihat, ka RBYF ha kane ka sngi ka la ai ruh ia ka song jingiarap lyngba ka pisa sha kane ka Seng Samla kum shi bynta ban ia don ryngkat halor kitei ki kam ba bha ban kyntiew ia ka bha ka miat ki khun samla ka Parish.
Ha kane ka sngi ka seng Samla Byrnihat Parish kum ka nongpyniaid ia kane ka Summer Penalty Shootout ka la sam ruh ia ki khusnam sha ki nongjop, ha kaba ia ka nam lahduh la rah da ka kynhun Tang Ar ngut kaba la ioh ia ka song pisa kaba T. 10 hajar bad ia ka nam baar pat la rah da ka Ar Kynhun kaba la ioh khur ia ka song pisa kaba T. 5 hajar.
