Shillong, Nailar 04: Hapdeng ka jingkthang ka mynsiem bad u lyoh ba dum uba la wan kah na ka jingkhlad ki 5 ngut ha ka jinghap ka Kali Alto ha riat Rngain, ka kynhun jong ka Search and Rescue Team (SRT) na Shillong hynne ka janmiet kila ioh ban sei ia baroh 5 tylli ki met ba sah jong ki lanot ha riat Rngain.
Lah ban kdew ba haka miet jong ka 3 tarik Nailar ka Kali Alto ba shong ki 5 ngut na ka juh ka iing kila khlad noh hadien baka kali kala thung baji ha riat Rngain kaba don ha surok Langkyrdem-Pynursla.
Ki lanot kiba khlad ba hap ka kali ha riat Rngain ki kynthup ka Kong Elida Marbaniang (65 snem), u Bah Mebanador Marbañiang (28 snem), u Bah Aimiki Marbañiang (23 snem) naka shnong Langkyrdem Laitlyngkot, ka Kong Risbun Kurbah (22 snem) bad i khunlung Dameban shngaiñ (1 snem 4 bnai) naka shnong Mawpun Rum East Khasi Hills.
Kane ka jingjia ka la pynkthang shisha ia kiba haing hasem bad wat ki shnong ki thaw bad ka thain hi baroh kawei kiba la hap ban mad ia katei ka jingjia kaba ym poi pyrkhat ba haduh ba 5 ngut ki mynsiem ba kordor ki la duh noh ia la ka jingim bad kaba kham ktah shuh shuh ka long hadien ka jingwan poi ki synduk hadien ba ka kynhun SRT ki la lah ban sei ia baroh ki met ba dangsah jong kitei ki 5 ngut na katei ka riat rngain.
