Nongpoh, Nailar 04: Kawei ka Jeep kaba don ia u number ML-05-E-8441, katba ka dang thmu ban knieh jubor ban iaid shakhmat ia ka Maruti Swift kaba don ia u number ML-05-AA-7205, ka la kylla khongpong sha Nala hadien ba ka la leit tynrah kynsan ia katei ka Kali Swift na ki bynta ba shadien haduh ba ka la kylla sha nala bad katei ka Kali Swift ka la julor bun na ki bynta ba shadien ka Kali.
Katei ka jingjia ka la jia hynnin ka miet Sngi u Blei ha ka por 7 baje eiei janmiet, ha kaba kitei ki kali, ki dei kiba don ha ka lynti ban kiew sha Shillong, hynrei haba la poi ha ki bynta ka surokbah-6 bad kaba hap hapoh ka shnong Nongthymmai Umsning , katei ka Jeep ia kaba la niah da u Gary Marboh, ka la leit ban tynrah nadien jong ka Maruti Swift bad hadien kata, ka la leit ban kylla sha nala.
Ka tyllong khubor khubor ba la ioh lum, la ong ba ka daw jong katei ka jingjia aksiden bad kaba la pynlong ia katei ka Jeep ba kan hap sha nala, ka dei na ka jingniah pynher step palat u nongniah ia katei ka Jeep bad uba la thmu knieh shakhmat ia katei ka Maruti Swift.
Haba iadei bad katei ka jingjia, baroh kitei ki kali ki la shah rah noh sha Umsning Police Station bad ia ki nongniah lem bad kiba la mynsaw haba ki shong ha kitei ki kali, la rah noh ia ki sha Umsning CHC na bynta ban ioh ia ki jingsumar kiba biang.
