Nongpoh, Nailar 10: Kumba ka jingiaseng kynthei ka Balang Presbyterian Nongpoh ka la sdang ia ka jingrakhe ia ka taiew lehkmen ka jingiaseng kynthei naduh ka 4 tarik u Nailar lyngba ki prokram bapher bapher bad mynta ka sngi u Blei la pynkut noh ia kane ka taiew lehkmen ki Longkmie ha ka ïingmane ka Balang Presbyterian Nongpoh.
Ia kane ka taiew lehkmen ka jingiaseng kynthei la pynlong da ka jingiaseng kynthei ka Balang Presbyterian Nongpoh, ha kaba ka jingiaseng ki kynthei ka la buh kyrpang da ka phang, kaba ong, ‘Ka jingpynjanai’ ba la sot na ka shithi sha ki Nong Korinth na ka lynnong kaba 13:11.
Ban pynphuh pynphieng ia kane ka taiew lehkmen ka jingiaseng kynthei la sdang da ka jingiaseng ha ka por 10:30 baje mynstep ba la wan ban sam ia ka ktien ka jong u Blei da ka Kong B. Warlarpih bad bud sa ka jingiaseng ha ka noh phai sngi ha ka por 1:30 ba la wan ban sam ia ka ktien ka jong u BLei da ka Kong Larisha Lyngkhoi, ha kaba kum ki shakri jong u Blei ki la ban khia halor ka kamram jong ki Longkmie ha ka Balang, ha ki ing ki sem bad ha ka imlang ka sahlang, kaba ngi dei ban bud katkum ka saindur jong U Blei.
Nalor ka jingsam ia ka ktien ka jong U BLei da kitei ki 2 ngut ki shakri jong u Blei sha ki longkmie jong ka jingiaseng kynthei ka Balang Presbyterian Nongpoh, ha kane ka sngi la pynphuh pynphieng ruh da ki jingrwai Choir ba la pynlung mynsiem ia ki paid jong U Blei bad la pynkut ruh ia ka jingrakhe da kaba ia rwai lang ia ka Theme Song jong kane ka taiew lehkmen ka jingiaseng Kynthei ka Balang Presbyterian Nongpoh.
