Nongpoh, Nailar 10: Hynnin ka sngi Saitjain, ka Kong Rona Khymdeit, MDC Nongpoh, ka la shah khot sngewbha ban iashimbynta ha ka ban rakhe ia ka Women Week ne ka Taiew lehkmen ka Jingiaseng Kynthei Balang Presbyterian Mawphru, kaba ki la rakhe baroh shi Taiew lynter ha katei ka Balang, kaba don hapoh ka shnong Mawphru Mathan, Ri Bhoi.
Lyngba katei ka Taiew lehkmen ka Jingiaseng Kynthei, ki la lah ban pynlong ia ki jingialehkai bapher bapher bad ia kaba la sam ia ki khusnam, sha kito ki nongjop ha ki jingiakop bapher bapher.
Ha katei ka sngi, ba ka Kong Rona Khymdeit, ka la leit sha katei ka shnong, ban rakhe bad ki Longkmie, ka la jurip ruh ia ka Government L.P School kaba don hapoh ka shnong, kaba la jot rathai eh bad ka la pynsngew ruh sha u Rakkam A. Sangma, Myntri ka tnat pule puthi ha ka sorkar jylla, da kaba kyrpad sha u ba un shimkhia pynioh jingiarap ia katei ka skul.
Haba iadei bad ka katei ka skul kaba la jot la pra, u Devidian Mangu, Rangbah Shnong, kumjuh ruh u Bah Sbun Damlong, President ka Managing Committee jong katei ka skul, ki la kyrpad ia ka MDC, ba kan leh eiei ne ban pynkren lem sha ki bor ba kham shalor, khnang ba katei ka skul kan ioh ia ki jingiarap na ka sorkar, namar ka dei ka skul kaba bun eh ki khynnah ki pule hapoh katei ka skul.
