Umroi, Nailar 11: Shibynta ban pynmih pisa na bynta ban tyllun ia ki kam leh isynei bad ruh ban peit lem ia kito ki longiing kiba don hapdeng ka pang ka shitom, na ka liang ka Balang Presbyterian Umroi Lumthehsei mynta ka sngi ka la plie paidbah noh ia ka lympung ialehkai football ia kaba la jer kyrteng kum ka Charity Football Knock Out Tournament ia kaba la pynlong ha ka madan jong ka shnong Umroi.
Kaba la ai mynsiem shikatdei eh ia ka Balang Presbyterian Umroi Lumthehsei, ka long ruh ba watla kam shem la don kano kano ka jingpynbna halor kane ka lympung hynrei ka jingpoi jong ki kynhun ban shimbynta ha kane ka lympung ialehkai football ka la kot haduh 32 tylli ki kynhun.
La wan ban plie pyrda ia kane ka lympung ialehkai football jong ka Balang Presbyterian Umroi Lumthehsei, da u Bah S. Pakyntein, Officer In-charge ka Umroi PIC kum u kongsan ha ka jingiadonlang ruh u Bah L.B Makri, Rangbah Shnong ka Umroi, Tbn. L Makri, u Bah S. Sylliang bad la pyniaid ia ka jingialang da u Bah PB Sylliang.
Ha kane ka sngi plie pyrda ia kane ka lympung ialehkai football jong ka Charity Football Knock Out Tournament la sakhi ia ka jingiakhun kaba itynnad bad iakhaid bormer bha hapdeng ki rangialehkai jong ka Mawthei Sc pyrshah ia ka Kyllumlang Fc ha kaba ka jingiakhun ha baroh ar kylla ka la kut noh hapdeng ka jingiakhaid khlem don ba ioh pynkhih jar.
Dei tang hadien ba ki nongpyniaid ki la rai ban rah beit sha ka tie breaker ba ka kynhun jong ka Kyllumlang Fc ka la lah ban pynliem noh ia ka Mawthei Sc.
