Nongpoh, Nailar 12: U Bah Sosthenes Sohtun, MLA Jirang,mynta ka sngi u la ai ka jingkhublei kaba kyrpang eh ia ka Ribansi Jamu, ka samla na ka shnong Mynnar Jirang ha Ri Bhoi District bad kaba la don bynta kum ka nongapkol ba paw ka kynhun ialehkai phutbol U-20 ka India, ha ka jingiaknieh ban ioh rung sha ka AFC U-20 Women’s Asian Cup, ka ban sa long ha Thailand ha u snem ban wan.
Kum ban shu kdew hangne, ka samla Ribansi Jamu, ka dei ka khun jong u Bah Welbin Syiem bad ka Kong Aitilut Jamu, ka la shah jied ha ka thup jong ki 20 ngut ki samla kiba hapoh ka 20 snem, ba kin mihkhmat ia ka India ha ka lympung AFC U-20 Women’s Asian Cup Qualifiers bad ba ka India ka la lah ban pynthikna ialade ban rung sha ka AFC U-20 Women’s Asian Cup, hadien ba ka la wan ha ka kyrdan ba hakhlieh ha ka miej iakhein poin, kaba dei ruh hadien 20 snem ba ka India ka la ïoh biang ban iakhun ha katei ka Lympung ialehkai phutbol ba heh ha Dewbah Asia.
Lah ruh ban kdew hangne, ba ha India kaba don ha ka Group-D ha ka jingiakhun ban iaknieh rung sha ka AFC U-20 Women’s Asian Cup 2026, kaba la donlang ka Myanmar, Indonesia bad ka Turkmenistan. Ha kaba ka India ka la pynliem da 7-0 pyrshah ia ka Turkmenistan, 1-0 pyrshah ia ka Myanmar bad kaba la iakhaid pat bad ka Indonesia.
Haba iadei bad katei ka jingdon bynta ka samla Ribansi Jamu ha ka kynhun ialehkai phutbol U-20 ka India, u Bah Sosthenes Sohtun kum u MLA ka thaiñ, u la ai ka jingkhublei kaba kyrpang ia katei ka samla bad u la ai ruh ka jingkitbok ia katei ka samla bad kumjuh ruh ia ka kynhun ialehkai U-20 ka India ba kin lah ban ialehkai bha ha ka AFC U-20 Women’s Asian Cup 2026 ka ban long ha Thailand.
