Shillong, Jylliew 15:
Ka jingjyllei jong u drok ha ka jylla bad khamtam ha sor Shillong, kadei kawei na ki mat kaba ishyrkhei khamtam ia ki khun samla kiba ngop noh ha kine ki jaid jingdih kiba pynjot ia ka ing ka sem, ka koit ka khiah shimet bad bunsien kaba ialam ruh sha ki kam tuh kam thiem, ki kam pyniap briew bad kiwei kiwei sniew ha ka imlang ka sahlang.
Ha kawei ka jingringdur kaba la ioh lum bad saphriang paidbah mynta ka sngi, la iohi ia ar ngut ki samla ha ki thain Polo kiba dang ia dung ia u thyrnia injek ban thep ia u drok sha ka met ka jongki, harud jong ka lynti iaid kjat, khlem jingkhuslai, jingtieng ne jinglehrain.
Kane ka jingshlur jong kitei ki samla ban leh ia kitei ki jaid kam pyllein pyllein ha ka mynsngi mynshai ha ki jaka paidbah, ka pyn-i ia ka jingtlot treikam jong ki bor ka ain, kaba la pynlong ia u drok ba un ioh lad ban suhthied ym shuh tang ha ki jaka sor, hynrei wat sha ki thain nongkyndong ruh kumjuh.
