Shillong, Jylliew 15:
Ki paidbah nongshong shnong jong ki hynriew tylli ki shnong kiba don mar syndah bad ka 4th Meghalaya Police (MLP) Battalion kaba don ha Sohpian, West Khasi Hills District mynta ka sngi da ka jingsngewbitar ki la mih paidbah ryngkat ki jingthoh ban pynrem ia ka sorkar jylla halor ka jingpynkynriah kam ia u Bah Lakador Syiem, Commandant jong katei ka 4th MLP Battalion.
Ki paidbah kiba wan ban mih ha kane ka sngi, ki la leit ruh ban ieng hakhmat ka khyrdop jong katei ka ktem pulit ryngkat ki jingthoh placard kiba pynrem ia ka sorkar bad dawa ba dei ban pynneh ia utei u heh ophisar pulit ha katei ka jaka.
Uwei na ki rangbah u la ong ba u naduh ka jingshimti jong u Bah Lakador Syiem, kum u Commandant jong ka katei ka ktem pulit, ki paidbah katei ka thain ki dap da ka jingsngewkmen namar udei u briew uba lah ban pyniadei bad iajan bad ki nongshong shnong, bad ruh uba la wan ia ka jingkylla ha rukom im jong ki paidbah ka thain.
Na ka liang kitei ki paidbah nongshong, ki la dawa ban pynneh biang ia u Bah Lakador Syiem ha katei ka jaka, khnang ba kan long ka jingmyntoi ia ki paidbah ka thain hi baroh kawei. Kum ban shu pyntip, u Bah Lakador Syiem u la leit ban shimti kum u Commandant jong katei ka ktem pulit ha ka 16 tarik jong u bnai Jymmang, 2023.
Kum ban shu pynkynmaw biang, na ka liang jong ka tnad kam poh ing ka sorkar jylla ha ka 14 tarik jong u bnai Jylliew, 2024, ka la pynmih ia hukum ban pynkynriah kam ia kiba bun ki heh ophisar pulit ka jylla. U Bah Lakador Syiem la pynkynriah kam noh ban leit shimti kum u Principal ka Police Training School, Umran, katba ha jaka ka jong u pat, yn wan ban shimti da u Rupam R Marak u ba dei Superintendent of Police (Security) jong ka nongbah Shillong.
