Shillong, Jylliew 15: Shibynta shwa ban pdiang ia ka lympung ialehkai ba la rim tam ha ka ri bad kaba la tip ruh kum ka Durand Cup, ki heh shipai ha Nongbah Shillong, kiba kynthup ia u Lt Gen R.C. Srinath, VSM Chief of Staff, Northern Command, GOC 101 Area, kiwei kiwei de ki heh shipai na ka 101 Area bad Northern Command lem bad ki heh ophisar na ka jylla, mynta ka sngi ki la leit ban jurip ia ka madan Jawaharlal Nehru Stadium (JN Stadium) kaba don ha Polo, East Khasi Hills District jong ka jylla Meghalaya.
La ioh jingtip ruh, ba hadien ba la dep ia ka jingleit jurip ia katei ka stadium, ka la don pat sa ka jingialang hapdeng u Myntri Rangbah ka sorkar jylla, u Conrad K. Sangma, u Myntri ka tnad Sport & Youth Affairs u Bah Shakliar Warjri lem bad ki ophisar, na bynta ban iakren bad pynbeit halor ka jingthmu ban pdiang ia kane ka lympung ialehkai football jong ka Ri India bad ruh kumno ban pynkhreh na bynta kane Durand Cup.
Lah ruh ban kdew hangne, ba ka Durand Cup ka la dei kawei na ki lympung ialehkai phutbol kaba la rim tam ym tang ha ka ri India hynrei ha ka dewbah Asia hi baroh kawei bad ha ka Durand Cup, kin sa don ki kynhun ialehkai ki shipai ban ia shimbynta, nalor ki kynhun ialehkai bna nam kiba don ha ka thup jong ka Indian Super League (ISL) bad ha ka I-League jong ka ri ruh kumjuh ki la pynkhreh ban wan ia shimbynta ha kane ka Durand Cup.
