Shillong, Nailar 25: Katba ki seng bhalang ha Rilum Khasi ki dang pyrshah jur ban wan rah ia ka surok rel sha Ri-lum Khasi katba ym pat lah ban wan rah ai ki ain kiba klain ban iada na ka jingwan rung kyrthem ki bar jylla, hynrei u MP ka Tura Parliamentary Constituency u la ai jingthoh sha u Myntri ranbah ka ri, u Narendra Modi ban dang pynheh ia ka surok rel ha Ri lum Garo na ka bynta ban pyniasoh sha kiwei kiwei ki nongbah jong ki jylla hapoh ka ri India.
Haba kren sha ki lad pathai khubor mynta ka sngi, u MP ka Tura u Saleng L. Sangma u la ong ba u la dep ban ai da ka jingtoh sha u Myntri rangbah ka ri India, u Narendra Modi ban kyrpad ban pyniasoh shuh shuh ia ka surok rel na Mendipathar sha kiwei kiwei ki nongbah jong ki jylla hapoh ka ri. Ha kajuh ka por ruh u la pan ban wan rah ruh ia ki Rel kiba kit mar (Goods Train) ha Mendipathar khnang ba kane kan ai jingmyntoi ia ki nongrep ban shalan ia ki mar rep sha kiwei kiwei ki jylla jong ka ri.
U la ong ruh kumba long haduh mynta ka surok rel kaba pyniasoh sha Mendipathar ka dei tang 14 km na Assam bad kam pat don ka surok ba pyniasoh pat sha kiwei ki jylla kum sha Delhi, Bangalore, Kanyakumari, Mumbai, Delhi, Calcutta bad kiwei ki nongbah.
Ha kawei ka bynta, u la ong ruh ba ia mynta um kwah ban pynheh ia ka Mendipathar Railway Station lane ban pyniasoh sha kiwei ki bynta jong ka Ri-lum Garo, hynrei kaei kaba u kwah ka long ban pyniasoh shwa na Mendipathar sha kiwei kiwei ki nongbah jong ki jylla ka ri.
Shuh shuh, u la bynrap ruh da kaba ong, ba ia mynta hi ka daw kaba um kwah ban pynheh ia ka Mendipathar Railway Station ne ban pyniasoh sha kiwei kiwei ki bynta jong ka Ri-lum Garo, ka dei ka jingma ia ka jingwan rung kyrthep ki mynder bad katba ym pat don kita ki ain kiba khlain un dang pyrshah ban pynheh ia ka Mendipthar Railway Station ne ban pyniasoh ruh sha kiwei kiwei ki bynta jong ka Ri-lum Garo, u la bynrap.
