Nongpoh, Nailar 25: Haba leit ban pynskhem ne pynbam smai ia ki nongialam ba pura ka Hynniewtrep National Youth Front (HNYF) 20mer Circle ha Ri Bhoi ha kane ka sngi Saitjain ba la dep, u President ba rangbah ka seng HNYF u Bah Sadon K. Blah, u la ong ba ka seng kam ju pynshlur ia ki nongialam ne ki dkhot ban leh ia ki kam beain kiba ktah ia ka jaid bynriew, hynrei ka seng ka khot ka wer ia ki samla ban don hapoh ka shatri jongka seng na ka bynta ban shim ia ka lyngkor ban kit ban bah ia ka eh ka shon ka jaid bynriew.
U la ong ruh ba ka seng HNYF kam dei satia kata ka seng kaba mih ne paid na kiwei kiwei ki seng, hynrei mynta kan kynjuh sha ka 30 snem ka jingiaid lynti ba la seng ha u snem 1996, halor ka nongrim ban shakri ia la ka ri bad ka jaid bynriew.
Kum u nongialam ba rangbah ka seng HNYF, u Bah Sadon K. Blah u la kyntu ia ki nongialam ka seng ba kim dei ban shim kabu tang ban rung hapoh ka seng na ka bynta ka jingmyntoi shimet, hynrei ki rung ha ka seng ka long ban shakri ia ka imlang ka sahalng bad khamtam ban iada ia ka ri bad ka jaid byrniew.
Ha kane ka sngi ba la pynskhem bad pynbam smai ia ki nongialam ka HNYF 20mer Circle la don ryngkat ruh u President ka HNYF Northern Region u Bah Hesting Lyngdoh, u General Secretary u Bah Alfred Malai, u Organizing Secretary u Bah Barna Manih lem bad kiwei kiwei ki nongialam bad ki dkhot ka HNYF.
Kitei ki nongialam ka HNYF 20mer Circle ba la pynskhem ki kynthup ia u Samla Ajay Ranee kum u President, General Secretary u Samla Vincent Sylliang lem bad kiwei kiwei ki nongialam bad ki dkhot kane ka circle.
