Nongpoh, Nailar 26: Ka long shisha ka khubor kaba sngewsih bad jingduhnong kaba khraw ia ka Mynken Christian Higher Secondary School bad wat ia ka Balang Presbyterian Umroi bad ruh ia ka imlang ka sahlang, ha kaba u Babu Everlasting Pyngrope kum u Principal ka Mynken Christian Higher Secondary School Bhoirymbong bad uba dei ruh u Tymmen Basan ka Balang Presbyterian Umroi u la leit noh ia lade sha ka ïing jong u Trai.
Kane ka khubor kaba la pynsngewsih kthang ia ki bor pyniaid ka skul Mynken, Ki nonghikai, ki khynnah skul, ka Balang bad wat ia ka shnong ka thaw bad ka imlang ka sahlang ha ka thain Umroi, ka dei hadien ba mynta ka sngi la ioh jingtip ba u Babu Everlasting Pynrope u la khlad noh mynta ka step hadpeng ka jingshah sumar ha Appolo Hospital Guwhati na ka jingshitom kaba don ha ka met jong i.
Kumba la iathuh da I khun jong I Babu Everlasting Pynrope, la ong ba ka jingpang ka la ban ia ka met jong I la kumba 1 bnai ei ei ha kaba I don hapeng ka jingshah sumar ha ki Doctor, bad la rah ia ha ka Sngi u Blei sha appolo Hospital Guwahati ban shah sumar bad u blei u la ibit noh ia I ban khot sha lade ha kaba tang hadien 2 sngi ka jingshah sumar bad mynta ka sngi I la khlad noh na sla jong kane ka pyrthei.
Kum ban pynpaw khyndiat khynsoit, wat la ym ioh ia ka jingtip kaba pura, u Babu Everlasting Pynrope u dei uba shong basah ha Umroi Jaiaw pdeng bad u Principal ka Mynken Christian Higher Secondry School, u la dei uwei u rangbah uba la noh synniang ha ka pule ka puthi kum u nonghikai bad u Principal bad nalor kata u la long ruh u tymmen basan ka Balang Presbyterian Umroi.
Ka nam bad ka burom ba ioh une u rangbah, ka dei ruh ka jingpaw ka Mynken Higher Secondary School Bhoirymbong ha ka kam ialehkai sport ba ka kynhun na kane ka skul na ka por sha ka por ka la ioh ban mihkhamt ia ka jylla ha Subroto Cup sha Nongbah Delhi.
Wat la ym lah ban tip lut ia ki synniang ki bynhei kiba u la synniang ha ka pule ka puthi bad ha ka imlang ka sahlang, hynrei kum u Rangbah u la noh synniang shisha ban kyntiew ia ka jingnang jingstad, ka pule ka puthi bad ia ka bha ka miat jong ka imlang ka sahalang.
Dang ha u snem 2024 u Babu Everlasting Pynrope u la ioh pdiang ruh ia ka National Teacher’s Award na ka kti ka President ka Ri India ka Droupadi Murmu ha Nongbah Delhi.
Kumba la ioh ban ia kren bad u khun jong I, wat la kim pat lah ban ia pynbeit na ka ing ka sem, hynrei ka jingeleh burom ba khatduh ia ka met ba dang sah jongi, ka lah ba long ha ka 28 tarik u Nailar 2025 ha u lum jingtep ka Balang Prebyterian Umroi.
