Nongpoh, Nailar 29: Ka la pynkmen mynsiem eh ia ki nongialam shnong, ki nongpyniaid ka School Managing Committee bad ia ki kmie ki kpa kiba phah skul ia ki khun jong ki sha ka skul Miss A.W. Thomas Secondary School, ka skul kaba don ha shnong Pynthor, Umroi bad kata ka dei ba hynnin ka sngi, u MLA ka Umroi, u Damanbait Lamare, u la leit ban plie noh ia ka Building ba thymmai ia kaba u la pynioh bad tei hapoh katei ka skul.
Haba plie ia katei ka Building ba dang shu tei hapoh katei ka skul, nalor u MLA, la sakhi ruh da ka jingdon ki nongialam shnong, ki dkhot ka School Managing Committee, ki nonghikai, ki khynnah skul lem bad ki kmie ki kpa jong ki khynnah skul.
Haba kren ha katei ka sngi, u Damanbait Lamare, u la ong ba u la pynmang pisa lyngba ka skim SRWP ha ka ban tei ia katei ka Building, khnang ba kan pynsuk ia ki khynnah kiba pule hapoh katei ka skul, ba kin lait na kaba shong khapngiah, khamtam eh ba katei ka skul, ka dei kaba bun ki khynnah ki leit ban pule hapoh katei ka skul.
La ioh ruh ka jingkren na ki nongialam shnong bad nongpyniaid ia katei ka skul, ha kaba ki la ai ka jingkhublei ia u MLA, u la pynioh ia katei ka Building hapoh katei ka skul bad kaba la long shisha ka jingmyntoi ia katei katei ka skul bad khamtam eh ia ki khynnah pule.
