Nongpoh, Nailar 29: Ki heh nongialam ka Ri Bhoi Youth Federation (RBYF), mynta ka sngi, ki la hiar sha ka shnong Khanapara, ka shnong kaba don ha syndah eh bad ka Sorbah Guwahati, kata ka long na bynta ban leit pynskhem ia ki samla na katei ka shnong, kiba la shim ia ka rai ban pyniasoh noh ïalade sha ka seng RBYF.
Ia kitei ki nongkitkam ba thymmai ka RBYF Khanapara Unit, la pynskhem da u Bah RJ Thangkhiew, Political Secretary ka RBYF Sengkmie, ha kaba la sakhi da ka jingdon u Bah Phrangsngi Kylla, Chief Organise ka RBYF Sengkmie, u Bah Denis Syngkli, Asst. General Secretary, u Bah Jeremy Lyngdoh, Rangbah Shnong Khanapara, ki seng longkmie Khanapara lem bad kiwei.
Lyngba jong katei ka sngi, ba pynskhem ia ki nongkitkam ka RBYF Khanapara Unit, u Bah Jeremy Lyngdoh, u la pynpaw ia ka jingkmen ba ka seng RBYF ka la lah ban pynkha shnat treikam hapoh ka shnong Khanapara, kaba dei ka shnong don ha syndah eh bad ka Sorbah Guwahati, kata na bynta ban iada ia u pud u sam bad khamtam eh ban wanrah ia ka bha ka miat hapoh ka shnong Khanapara, ka shnong kaba la shong khleh ki jaid hynriew.
U Bah RJ Thangkhiew, kum u nongpynskhem ne pyntian smai ia kitei ki nongkitkam ka RBYF Khanapara Unit, u la pynpaw ia ka jingsngewkmen bad ki samla kiba shong ba sah hapoh katei ka shnong khappud eh bad ka Assam, ba kin pyniasoh ïalade sha ka RBYF.
Nalorkata, na ka liang u Bah RJ Thangkhiew, u la kyntu ia kitei ki dkhot ba ki dei ban long kum kita ki nongiada ia u pud u sam, ban iada ia ka shnong ka thaw, khamtam eh ba ka shnong Khanapara, ka dei kaba iajan bad ka Assam, khamtam eh bad ka Sorbah Guwahati.
Ki nongkitkam ka RBYF Khanapara Unit, ki kynthup ia Bah Shan Lyngdoh kum u President, u Bah Shem Khongjoh, kum u General Secretary lem bad kiwei ki nongkitkam bad ki dkhot jong katei ka Unit.
