Nongpoh, Nailur 27: “Ngan iaineh ha ka jinglong ban long u briew ba sngewrit bad trei shitom, na bynta ka burom ia ki paidbah ka Konstitwensi, ia ka Ri Bhoi bad jylla hi baroh kawei” ong u Bah Sosthenes Sohtun, MLA bad MDC Jirang, uba la long ruh mynta kum u Myntri ha ka sorkar jylla, ha ka sngi shah pynkup burom ha Jirang.
Ha ka jingkren jong u hakhmat ki paidbah, u Bah Sosthenes Sohtun, u la phla paidbah ruh da kaba ong, ba um da sngewtynnad eh ia ka Politik, hynrei u don pat ka mynsiem shakri paidbah, da ka mynsiem ba sngewrit bad khlem da don kano kano ka jingleh shilliang iano iano ruh.
Ha katei ka sngi shah pynkup burom ha ki nongialam ka NPP Jirang Block, u Bah Sosthenes Sohtun, u la batai naduh ka por ba u la jop nyngkong eh ia ka Ilekshon ha u snem 2018, ha kaba u la ong ba mar ia long kum u MLA, u duwai sha u Blei ba un ai jingstad jingshem phang, nangta ka mynsiem ba sngewrit, ban don ka jingiatreilang bad ki Myntri Sor, ki ophisar sorkar lem bad ki paidbah.
Shuh shuh, u la pynkynmaw ba ha ka Ilekshon 2023, la bun ka jingshah kren bad jingshah kynthoh ha kiba bun bad khamtam eh kiba nabar ka Konstitwensi, ha kaba ka sur ka mih ba un rem beit ha ka Ilekshon, hynrei ki paidbah ka Jirang Constituency ki sngewthuh ia ka jingtreikam kum u MLA bad kumta ki la pynjop don burom ha ka sien ba-ar.
